Қонаевта инвестиция көлемі 88 млрд теңге болатын жем өндірісі салынады

Алматы облысында инвестиция көлемі 88 млрд теңгеден асатын үй жануарларына арналған жем өндіретін зауыт салынады. Тиісті қаулыға премьер-министр Олжас Бектенов қол қойды, деп үкіметтің баспасөз қызметі хабарлады.

Ауыл шаруашылығы министрлігі Қонаев қаласында кәсіпорын салуды көздейтін «Mars Petcare Kazakhstan» ЖШС-мен келісім жасасты. Инвестициялардың жалпы көлемі 88,8 млрд теңгеден асады. Жобалық қуаты - жылына 100 мың тонна өнім.

Жем өндіретін зауыттың құрылысын 2030 жылдың соңына дейін аяқтау жоспарлануда. Жұмыс 2031 жылдың 1 қаңтарында басталады. Зауытта Қазақстан азаматтарының үлесі кемінде 85% болатын 200 жұмыс орны құрылады. Сондай-ақ, кадрларды оқыту және олардың біліктілігін арттыру бойынша іс-шаралар жоспарлануда.

Жобаны іске асыру қосылған құны жоғары отандық өнім желісін кеңейтуге және өңірде тұрақты өндірістік базаны қалыптастыруға мүмкіндік береді.