Қазақстанда ветеринарлардың жалақысы қаншалықты өсті
Қазақстанда ветеринарлық дәрігерлердің орташа жалақысы 119,7 мың теңгеден 271,5 мың теңгеге дейін өсті. Бұл туралы Мәжіліс депутаттарының сұрауына жауап ретінде вице-премьер - ұлттық экономика министрі Серік Жұманғарин мәлімдеді.
Вице-премьердің ақпараты бойынша, 2023-2025 жылдары республикалық бюджеттен ветеринариялық мамандарға еңбекақы төлеу деңгейін арттыру үшін өңірлердің әкімдіктеріне нысаналы трансферттер түрінде 29,6 млрд теңге бөлінді. 2026-2028 жылдарға 12,2 млрд теңге көлемінде жыл сайынғы қаржыландыру көзделген.
2023 жылдан бастап I және II топтағы патогендік биоагенттермен жұмыс істейтін ветеринарлық мамандарға тиісінше 35 және 50% мөлшерінде қосымша төлемдер есептеледі. Сондай-ақ, кем дегенде екі жалақы мөлшерінде сауықтыру жәрдемақысын төлеу қарастырылған.
Сонымен қатар, Серік Жұманғарин 2025 жылдың қазан айында республикалық бюджеттік комиссия ветеринарлардың жалақы деңгейін одан әрі арттыруға бағытталған ветеринария мәселелері жөніндегі заң жобасын қолдағанын атап өтті. Құжат жыл сайынғы демалыс беру кезінде жылына бір рет сауықтыру жәрдемақысын төлеуді, сондай-ақ ғылыми дәрежесі үшін 17 АЕК (ғылым кандидаты) және 34 АЕК (ғылым докторы) мөлшерінде қосымша ақы белгілеуді көздейді. Қосымша сыйлықақылар енгізу жоспарлануда.
Бұдан басқа, қызметкерлердің басқа да санаттарын қолдаудың жаңа шаралары жоспарлануда: олар мал шаруашылығын дамытудың 2026-2030 жылдарға арналған Кешенді жоспарында көзделген.
«Тиісті нормативтік-құқықтық актілерге өзгерістер енгізе отырып, шопандар мен бақташылар үшін жұмыс орындарын субсидиялау тетігін қолдану мәселесі пысықталуда. Бұдан басқа, көшпелі мал шаруашылығымен айналысатын қызметкерлердің осы санаттарын зиянды еңбек жағдайларында қызметті жүзеге асыратын адамдар тізбесіне қосу мүмкіндігі қарастырылуда. Осылайша, мал шаруашылығы қызметкерлерін әлеуметтік қолдауды күшейту және олардың еңбегін көтермелеу жөніндегі шаралар практикалық іске асыру сатысында тұр», - деді Серік Жұманғарин.