Ақмола облысында субсидия алуға өтінімдер қабылдау басталды

Ақмола облысының Ауыл шаруашылығы және жер қатынастары басқармасы асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялау бағдарламасы аясында өтінімдер қабылдаудың ашылғанын хабарлады.

Өтінімдерді қабылдау бүгін сағат 11:10-да басталды. Бұл ретте резервке (күту парағына) түскен өтінімдер бойынша субсидияларды төлеу олардың келіп түскен күні мен уақытына сәйкес кезектілік бойынша жүзеге асырылады, деп атап өтті Ауыл шаруашылығы басқармасында.

Естеріңізге сала кетейік, Қазақстанның ауыл шаруашылығы министрлігі ағымдағы жылдың наурыз айының соңында субсидиялаудың жаңа жүйесін ұсынуды жоспарлап отыр. Қазіргі таңда ол талқыланып жатыр. Жаңа жүйеде саланы сыбайлас жемқорлыққа қарсы талдау барысында анықталған бұзушылықтар ескерілген. Реформа аясында субсидиялар алуға арналған бірыңғай платформа әзірленді, оны пайдалану үшін фермерлерге ақы төлеуге тура келмейді.

Алдын ала ақпаратқа сәйкес, мемлекеттік қолдауды екі бағыт бойынша: несиелер, лизинг және сақтандыру шарттары бойынша мөлшерлемелерді субсидиялау, сондай-ақ инвестициялық субсидиялар бойынша қалдыра отырып, барлық тауарға тән субсидияларды толығымен алып тастау жоспарлануда. Мөлшерлемелерді субсидиялауға 252 млрд теңге, инвестсубсидияға 106 млрд теңге бөлу жоспарлануда.