Экология министрлігі балық өсірушілердің шығындарын субсидиялау ережелерін бекітті
ҚР экология, геология және табиғи ресурстар министрінің 2022 жылғы 14 маусымдағы бұйрығымен инвестициялық салымдар кезінде балық шаруашылығы субъектісі шеккен шығыстардың бір бөлігін өтеу бойынша субсидиялау қағидалары бекітілді.
Құжатқа сәйкес субсидиялар электрондық өтінім берілгенге дейін екі жылдан аспайтын уақытта пайдалануға берілген инвестициялық жобалар бойынша беріледі.
Субсидиялауға жаңа, бұрын пайдаланылмаған техника, машиналар және (немесе) жабдықтар жатады:
- инвестициялық жоба пайдалануға берілетін күнге дейін 24 айдан ерте емес сатып алынған;
- шығарылған жылы инвестициялық жоба пайдалануға берілетін күнге дейін 36 айдан ерте емес.
Егер жобаның паспорттары бойынша техниканы, машиналарды және (немесе) жабдықтарды ғана сатып алу көзделсе, өтінім берілген жылға дейін 3 жылдан ерте емес сатып алынған техника, машиналар және (немесе) жабдықтар субсидиялауға жатады.
Субсидияларды есептеу нақты салынған инвестициялар бойынша жүзеге асырылады.
Сондай-ақ, құжатта жұмыс органы (көрсетілетін қызметті беруші) жыл сайын 1 ақпанға дейін субсидиялаудың ақпараттық жүйесінде өз қызметкерлерінің, жергілікті атқарушы органдардың, балық шаруашылығы саласындағы Экология министрлігінің аумақтық бөлімшелерінің, жануарлар дүниесін қорғау, өсімін молайту және пайдалану саласындағы аккредиттелген ғылыми ұйымдардың және басқа да ұйымдардың өкілдерінің қатысуымен мамандар тобын тіркейтіні көрсетілген. Топқа кемінде бес адам кіреді және оның жалпы саны тақ сан болады.
Тақырып бойынша оқу: Экология министрлігі аквамәдениетті субсидиялау ережелерін жаңартты
Бұл топ жобалардың барлық паспорттары бойынша құжаттарды тексеруді, инвестордың объектісін, сатып алынған жабдықты (техника мен машиналарды) растайтын фото және бейнематериалдарды қоса бере отырып, шарттарға сәйкестігін тексеруді жүзеге асыратын болады. Сондай-ақ, ол өндірістік қуаттылықтардың жүктелуіне қол жеткізуді тексереді және субсидияларды есептеуді жүргізеді.
Ережеге сәйкес, әрбір объектіге кем дегенде екі маман жіберіледі. Қарап тексеру инвестордың немесе оның сенім білдірген адамының қатысуымен жүзеге асырылады, нәтиже инвесторды қарап тексеру және өндірістік қуаттылықтардың жүктемелеріне жеткендігіне көз жеткізу актісімен ресімделеді.
Инвестициялық салымдар кезінде келтірілген шығыстардың бір бөлігін өтеу бойынша субсидиялау бюджет қаражаты есебінен жүзеге асырылады. Қаражат игерілмеген жағдайда, үшінші тоқсаннан бастап қаражат қайта бөлінетін болады.
Субсидиялауға өтінім беру "Электрондық үкімет" веб-порталы арқылы электрондық түрде жүзеге асырылады және субсидиялаудың ақпараттық жүйесінде тіркеледі.
Құжаттың толық мәтінімен мына жерде танысуға болады.