Қазақстанда түйе шешегі ауруына қарсы вакцина шығарыла бастады

Биология және биотехнология мәселелері бойынша ҒЗИ аталған ауруға қарсы дәріні сынақтан өткізіп, түйе шешегіне қарсы вакцина шығаруға кірісті. Бұл туралы ҚР Ауыл шаруашылығы министрлігінің баспасөз қызметі хабарлады.

«Отандық биология және биотехнология мәселелері ғылыми-зерттеу институты сынақ өткізіп, оң нәтиже алып, түйенің шешек ауруына қарсы вакцина шығаруға кірісті. Заңнамаға сәйкес ҚР АШМ Ветеринариялық бақылау және қадағалау комитеті оны тіркеуді жүзеге асырады», — деп хабарлады ведомстводан.

Бұған дейін Ветеринария бойынша ұлттық референттік орталықтың зертханалық зерттеу нәтижелері негізінде Маңғыстау облысының Бейнеу, Тәжен және Сыңғырлау ауылдық округтерінде түйелердің шешегі бойынша карантин енгізілген еді.

«Түйелердің өлім-жітімі  болған жоқ, бірақ жануарлар оқшауланып, ҚР АШМ Ветеринариялық бақылау және қадағалау комитетінің аумақтық инспекциясының және әкімдіктердің ветеринариялық бөлімшелерінің қадағалауында болады. Бұл анықталған ошақтарда Республикалық эпизоотияға қарсы отрядтың Маңғыстау филиалының мамандары дезинфекциялық жұмыстар жүргізуде» — деп мәлімдеді АШМ.