Азық-түлік корпорациясы Парсы шығанағы елдеріне астық жеткізуді жоспарлап отыр

Азық-түлік корпорациясы ағымдағы жылы қазақстандық бидай экспортының географиясын кеңейтуді жалғастыруды жоспарлап отыр. Атап айтқанда, Парсы шығанағы елдерінің нарықтарына шығу қарастырылуда. Бұл туралы астық операторының баспасөз қызметі хабарлады.

«Ұлттық оператор күрделі мультимодальды бағыттарды игере отырып, қазақстандық бидайға алыс экспорттық алаңдарға жол ашады. Жаңа маусымда Азық-түлік корпорациясы Парсы шығанағы елдерінің нарықтарына шығып, қол жеткізілген экспорт көлемін сақтап қалуды жоспарлап отыр. Сонымен қатар Оңтүстік-Шығыс Азия бағытындағы көлік дәліздерін, сондай-ақ Үнді мұхитына шығатын Иран порттары арқылы өтетін бағыттарды дамыту бойынша жұмыстар жүргізілуде», - деп ұлттық компанияда хабарлады. 

2024/25 маркетингтік жылдың қорытындысы бойынша Азық-түлік корпорациясы рекордтық 1,3 млн тоннаны сата отырып, астықтың ең ірі ұлттық жеткізушісі болды. Бұл алдыңғы маусымнан төрт есе көп және соңғы он жылдағы ең жоғары нәтиже.

Баспасөз қызметінің мәліметінше, астық операторының жеткізу географиясы өткен жылы 12 елге дейін кеңейтілді.

Жаңа маусымда Азық-түлік корпорациясы процестерді цифрландыру, астық қоймаларын дамыту және жаңғырту, фермерлерді, оның ішінде шағын және орта шаруашылықтарды қолдау құралдарын кеңейту бойынша міндеттер қояды.

«Корпорация басшылығы астық есебі мен қозғалысын қоса алғанда, негізгі процестерді цифрландыру жоспарларын әзірлеп, біртіндеп жүзеге асыруда. Бұл операциялардың ашықтығын, мемлекеттік астық ресурстарының сақталуын арттыруға және фермерлермен өзара іс-қимылды сапалы жаңа деңгейге шығаруға мүмкіндік береді», — деді Азық-түлік корпорациясының 30 жылдығына арналған конференцияда ауыл шаруашылығы вице-министрі Азат Сұлтанов.