Қазақстанда 4,7 млн тонна астық бастырылды

Бүгінгі таңда қазақстандық аграрлар 4,7 млн га астық жинады, орташа өнімділігі 10 ц/га кезінде 4,7 млн тонна астық бастырылды. Бұл туралы ElDala.kz ҚР Ауыл шаруашылығы министрлігінің баспасөз қызметіне сілтеме жасай отырып  хабарлайды.

Елдің оңтүстік өңірлері астық жинауды аяқтауда. Атап айтқанда, Шымкентте егін толығымен жиналды, Жамбыл облысында - 98,3%, Түркістан облысында - 86%.

Басқа дақылдарды жинау да жалғасуда: өнімділігі 7 ц/га болатын 58,7 мың тонна майлы дақылдар бастырылды. Сонымен қатар, 728,4 мың тонна картоп, 1,9 млн тонна көкөніс және 2,7 млн тонна бақша дақылдары жиналды.

Егін жинау науқанына 149,9 мың трактор, 38,6 мың комбайн, 13,5 мың орақ және 140,3 мың басқа техника жұмылдырылды.

Егін жинау науқанына арналған 426 мың тонна жеңілдікті дизель отынының 207 мың тоннасы (49%) төленіп, 185 мың тоннасы (43%) жөнелтілді.

Биыл "Аграрлық несие корпорациясы" АҚ желісі бойынша көктемгі егіс және егін жинау жұмыстарын қаржыландырудың жалпы сомасы 140 млрд теңгені құрады. Қаражат толығымен игерілгені атап өтілді.

Сондай-ақ Азық-түлік корпорациясы арқылы 21,2 млрд теңге ауыл шаруашылығы өнімдерін форвардтық сатып алуға, көктемгі егіс жұмыстарын іске асыру және кейіннен қаржыландыру үшін 528 мың тонна көлемінде тауарлық несиелеуге тағы 60 млрд теңге бағытталды.