Үкімет Қазақстанда ауыл шаруашылығы жерлерін жалға беру лимиттерін қайта қарайтын болады

2023 жылы енгізілген бір заңды тұлғаға жерді жалға беру шектеулеріне байланысты Қазақстандағы агрохолдингтерде егістік жерлерінің бір бөлігін жоғалту қаупі бар. Осы шешімнің ауыл шаруашылығы өндірісі мен азық-түлік қауіпсіздігі үшін салдарын ескере отырып, Сенат депутаттары бұған дейін Үкіметке белгіленген шекті мөлшерлерді қайта қарауға шақырған болатын. Бұл ұсынысты премьер-министр Олжас Бектенов қолдады.

Депутаттық сауалға берген жауабында Үкімет басшысы ҚР-да ауыл шаруашылығы жерлерінің шекті (ең жоғары) мөлшері бойынша мынадай ұсынымдар қабылданғанын атап өтті: заңды тұлғалар үшін – 51 мың гектардан аспайды, шаруа қожалықтары үшін – 35 мың гектар. Бұл ретте жергілікті жағдайлар мен ерекшеліктер ескерілуі тиіс.

«Сонымен қатар, ауыл шаруашылығы өндірушілерінен ауыл шаруашылығы жерлерінің осы мөлшерін қайта қарау жөнінде ұсыныстар келіп түсуде. Ауыл шаруашылығы мақсатындағы жерлерді қорғау және пайдалану мәселелері облыстар әкімдіктерінің қатысуымен Үкіметтік жұмыс комиссиясының отырыстарында тұрақты негізде қаралады, оның міндеттері ауыл шаруашылығы жерлерін ұтымды пайдалану мәселелерін қарау, сондай-ақ кейіннен ауыл шаруашылығы айналымына енгізе отырып, жерлерді ашық және әділ қайта бөлу болып табылады.

Ауыл шаруашылығы жерлерінің шекті (ең жоғары) мөлшерін қайта қарау мәселесі аталған комиссия шеңберінде қаралатын болады», - деді Олжас Бектенов.

Бұған дейін сенатор Талғат Жүнісов орта және ірі агроқұрылымдардың үлесіне егіс алқаптары мен астық өндіру көлемінің 60%-дан астамы тиесілі екенін айтқан болатын. Адал ауыл шаруашылығы құрылымдары топырақтың құнарлылығын қалпына келтіруге белсенді инвестиция салады, заманауи агротехнологияларды енгізеді, машина-трактор паркін жаңартады, ауыл шаруашылығы шикізатын өңдеуді игереді, жұмыс орындарын құрайды. Алайда, ұзақ мерзімді жалдау мерзімі аяқталғаннан кейін ірі агроқұрылымдар сол шекараларда жерді пайдалану шартын ұзарта алмайды.

Депутаттардың пікірінше, жер телімдерінің шекті мөлшері туралы талап Үкіметтің аталған шешімі қабылданғанға дейін жер банкін басқарған адал жер пайдаланушыларға қолданылмауға тиіс.

«Бұл норма өз қызметі барысында елеулі инвестициялық қаражат салған, жұмыс орындарын құрған, инфрақұрылымды жолға қойған және қалпына келтірген ауыл шаруашылығы өндірушілерінің жылдар бойы жинағанын жоюмен байланысты», - деді Талғат Жүнісов.