Ауыл шаруашылығы министрлігі Қырғызстанмен шекарада шегірткенің таралуын бақылауда

Фото көзі: МСХ РК

ҚР Ауыл шаруашылығы министрлігі қырғыз мамандарымен бірлесіп шегірткенің таралу ошақтарын бақылау үшін шекара маңындағы аумақтарды тексеруді бастады, деп ведомствоның баспасөз қызметі хабарлады.

Бұған дейін осындай іс-шаралар Өзбекстан шекарасында өткізілген болатын.

Ауыл шаруашылығы вице-министрі Ермек Кенжеханұлы шегірткенің таралуына қарсы іс-қимыл жөніндегі республикалық штаб отырысында хабарлағандай, қазіргі уақытта Өзбекстанмен шекаралас аумақтарда марокко және басқа да табын шегірткелерінің ошақтары анықталған жоқ.

«Бүгін біз өз тарапымыздан шекара учаскелерінде қырғыз тарапымен бірлескен зерттеуді бастадық. Шегіртке зиянкестерінің негізгі ошақтары Қырғызстанның оңтүстік аймақтарында шоғырланған. Алайда қазіргі уақытта Қазақстан бағытында жәндіктердің көші-қон қаупі тіркелген жоқ», - деді Ермек Кенжеханұлы.

Сонымен қатар, АШМ мәліметтері бойынша, зерттеулер Ресеймен шекарада жалғасуда. Абай облысында және Солтүстік Қазақстан өңірінде шекара маңы учаскелері зерттелді - шегіртке зиянкестерінің таралу жағдайлары анықталған жоқ. Алдағы күндері - маусымның бірінші және екінші онкүндігінде осындай іс-шараларды Ақтөбе, Атырау, Батыс Қазақстан, Қостанай, Шығыс Қазақстан және Павлодар облыстарында өткізу жоспарлануда.

Қытайдың шекаралас аймақтарына келетін болсақ, қазіргі уақытта шекаралас учаскелерде шегірткелердің таралуының ресми расталған жағдайлары тіркелген жоқ.

2 маусымдағы жағдай бойынша 6,1 млн га алаң зерттелді - бұл жоспарланған көлемнің 35,6%. Қазірдің өзінде 971,5 мың га өңделген, бұл болжамды 2,1 млн га шегірткенің таралу алаңының 46,3%-ын құрайды.

Қазіргі уақытта өңдеу жұмыстары 15 өңірде жүргізілуде. Солтүстік Қазақстан облысында зиянкестердің алғашқы ошақтары пайда болған кезде іс-шаралар басталады. Барлығы 443 бірлік бүрку техникасы жұмылдырылды, өңірлер қажетті ресурстармен қамтамасыз етілді.