Қазақстан ШЫҰ аграрлық саудасының бірыңғай платформасын құруды ұсынды

Фото көзі: МСХ РК

Қазақстан Шанхай ынтымақтастық ұйымының аграрлық саудасының бірыңғай цифрлық платформасын құруды ұсынды. Бұл туралы ҚР Ауыл шаруашылығы министрлігі ШЫҰ-ға мүше мемлекеттердің Пекиндегі ауыл шаруашылығы министрлерінің X кеңесінің қорытындысы бойынша хабарлады.

Ауыл шаруашылығы вице-министрі Ермек Кенжеханұлы аграрлық саладағы өңірлік әріптестікті тереңдету бойынша бірқатар бастамаларды көтерді. Атап айтқанда, жаһандық сын-қатерлер жағдайында ауыл шаруашылығы ШЫҰ кеңістігінде тұрақтылық пен азық-түлік қауіпсіздігін қамтамасыз ету үшін шешуші мәнге ие болатыны атап өтілді.

Осыған байланысты электрондық сертификаттау, логистикалық мониторинг және өнімнің шығу тегін бақылау тетіктерін қамтитын ШЫҰ аграрлық саудасының бірыңғай цифрлық платформасын құру ұсынылды.

Үйлестіру орталығын құруды, бірлескен зерттеулер мен білім беру бағдарламаларын жүргізуді қоса алғанда, селекция, тұқым шаруашылығы және аграрлық ҒЗТКЖ саласындағы ғылыми ынтымақтастықты жандандыру да маңызды бағыт болып қала береді.

Техникалық регламенттер мен фитосанитариялық стандарттарды үйлестіру, қазақстандық тараптың пікірінше, өзара сауданы кеңейтудің және тарифтік емес кедергілерді жоюдың маңызды шарты болып табылады.

АШМ деректері бойынша, 2024 жылы Қазақстанның агроөнімдерінің сыртқы сауда айналымының 69%-ы ШЫҰ елдеріне тиесілі болды, бұл өзара байланыстың жоғары деңгейін және кооперацияны одан әрі ұлғайту әлеуетін көрсетеді.

«Біз агросфераны бәсекелестік емес, стратегиялық серіктестік кеңістігі ретінде қарастырамыз. Қазақстан сенім, үйлестіру және өзара толықтыру қағидаттарына негізделген бірыңғай аграрлық кеңістікті қалыптастыруға белсенді үлес қосуға дайын», - деді Ермек Кенжеханұлы.

Кеңес қорытындысы бойынша ШЫҰ-ға мүше мемлекеттердің ауыл шаруашылығы министрлерінің оныншы отырысының хаттамасына қол қойылды, ол елдердің аграрлық өзара іс-қимылды кеңейтуге дайындығын тіркеді.