Қазақстан Өзбекстанға аграрлық экспортты 14,5 млн тоннаға дейін арттыруға дайын

Қазақстан астық, бұршақ, майлы дақылдар, ұн және өсімдік майын қоса алғанда, Өзбекстанға аграрлық өнім экспортын 14,5 млн тоннаға дейін кеңейтуге дайын. Сондай-ақ, ҚР-да бірлескен агрокластерлер құруды ұсынады. Бұл туралы Ташкентте өткен Орталық Азия және Әзірбайжан мемлекеттерінің сауда және инвестициялар министрлері кеңесінің бірінші отырысында ҚР сауда және интеграция министрі Арман Шаққалиев мәлімдеді.

ҚР Сауда министрлігінің мәліметінше, Қазақстан Өзбекстанға бордақылау алаңдарын, ет пен сүтті өңдеуді, май саласын дамытуды және шекара маңындағы агрокластерлерді құруды қоса алғанда, толық өндірістік тізбектерді қалыптастыруға көшуді ұсынды.

Мұндай бастамаларды іске асыру азық-түлік қауіпсіздігін нығайтуға және бірлескен өнімді Қытай, Таяу Шығыс және Оңтүстік Азия нарықтарына шығаруға мүмкіндік береді.

Сондай-ақ, көліктік-логистикалық жобалар ынтымақтастықтың маңызды бағыты деп аталды. Қазақстан мен Өзбекстан транзиттік дәліздердің дамуын өңірлік сауданың өсуінің стратегиялық факторы ретінде қарастырады. Өткен жылы Қазақстан арқылы Транскаспий халықаралық көлік бағыты бойынша тасымалдау көлемі өткен жылмен салыстырғанда 35%-ға ұлғайып, шамамен 2,8 млн тоннаны құрады. Қазақстан тарифтік саясатты үйлестіруді күшейтуді, логистикалық процестерді цифрландыруды жеделдетуді, инфрақұрылымды жаңғыртуды және бизнес шығындарын азайту және дәліздердің өткізу қабілетін арттыру үшін «қағазсыз сауда» тетіктерін енгізуді ұсынды.

Сауда министрлігінің мәліметінше, ағымдағы жылдың тоғыз айында Қазақстан мен Өзбекстан арасындағы екіжақты тауар айналымы 3,4 млрд долларға жетіп, 18%-дан астам өсімді көрсетті. Стратегиялық міндет — өзара сауданы 10 млрд долларға дейін ұлғайту.