Жамбыл облысында егіс алқаптарын суаруға арналған 46 ұңғыма қалпына келтірілуде

Фото көзі: МВРИ

Жамбыл облысының Меркі ауданында егіс алқаптарын суару үшін 46 су жинау ұңғымасын қалпына келтіру жұмыстары жүргізілуде. Жоба Еуропалық қайта құру және даму банкімен бірлесіп жүзеге асырылуда, деп ҚР Су ресурстары және ирригация министрлігінің баспасөз қызметі хабарлады.

Ведомствоның мәліметінше, бүгінде Ойтал ауылдық округінде 13 ұңғыма қалпына келтіріліп, іске қосылды. Андас-Батыр ауылдық округінде 27 ұңғыма іске қосылды және маусым айының соңына дейін қалған 6 ұңғыманы сынау жоспарлануда. Бұл су жинау ұңғымалары шамамен 2,7 мың га суармалы жерді сумен қамтамасыз ететін арналарды толтыруға арналған.

Сонымен қатар, Жамбыл облысының Шу ауданында Сол жағалау және Оң жағалау магистральдық арналарын қайта жаңарту басталды. Нысандардың жалпы ұзындығы 88 км-ден асады. Қазіргі уақытта каналдарда топырақ және тазарту жұмыстары жүргізілуде. Бұл нысандарды қайта жаңарту Шу ауданының 18,1 мың га суармалы жерлеріне су беруді жақсартуға мүмкіндік береді. Жұмыстар Ислам даму банкімен бірлескен «Климаттық орнықты су ресурстарын дамыту» жобасының бірінші кезеңі аясында жүргізілуде. Екі магистральдық арнаны қайта жаңартуды 2027 жылдың соңына дейін аяқтау жоспарлануда.

Қордай ауданында ұзындығы 18 км болатын «Благовещенский» арнасын қайта жаңарту жұмыстары жүргізілуде. Жобаны ағымдағы жылдың соңына дейін аяқтау жоспарлануда.

«Жамбыл облысының суармалы алқаптарын тұрақты сумен жабдықтауды және су ресурстарын неғұрлым тиімді пайдалануды қамтамасыз ету үшін өңірде ауқымды инфрақұрылымдық жобалар іске асырылуда. Енді барлық жұмыстардың сапалы және уақтылы орындалуын қамтамасыз ету қажет. Біздің министрлік бұл мәселені ерекше бақылауда ұстауда», — деп атап өтті су ресурстары және ирригация министрі Нұржан Нұржігітов Жамбыл облысындағы аталған нысандарды аралау барысында.