Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
Тоқаев Қазақстанда аграрлық өнімнің логистикасын дамытуға шақырды
13:18
Қазақстан Президенті Қасым-Жомарт Тоқаев халыққа жыл сайынғы «Жаңа тарихи кезеңдегі Қазақстанның өзекті міндеттері» атты Жолдауында ауыл шаруашылығы өнімдерін өңдеу, сақтау және өткізу жүйесін дамытуды тапсырды.
«Ірі агрохолдингтерден бастап шағын фермерлік шаруашылықтарға дейінгі барлық ауыл шаруашылығы тауарын өндірушілерге агрологистика орталықтарының қызметтерін кедергісіз пайдалану мүмкіндігі қамтамасыз етілуі керек. Жалпы, ауыл шаруашылығы инфрақұрылымын дамытуға ерекше назар аудару қажет. Бұл – стратегиялық маңызы бар міндет. Сондықтан үкімет пен «Бәйтерек» холдингі бірлесіп, нақты шешімдер әзірлеуі керек», – деді Қасым-Жомарт Тоқаев.
Мемлекет басшысы ауыл шаруашылығы өнімдерін терең өңдеуді дамытуға да ерекше көңіл бөлуге шақырды. Ол осы бағыттағы табысты жобалар ретінде қатал климат жағдайына қарамастан жүгері мен соя өсіріп, өңдеп жатқан Қызылорда облысының тәжірибесін атап өтті. Ал Түркістан облысында қытайлық инвестор мақта өңдеу және тоқыма кластерін іске қосып, су ресурстарын тиімді пайдаланып отыр.
«Үкімет осындай озық тәсілдерді бүкіл ел бойынша кеңінен енгізуге жағдай жасап, инвесторларға уақтылы қолдау көрсетуі керек. Сондай-ақ мұндай заманауи тәсілдерді мал шаруашылығында да кешенді түрде қолданған жөн», – деді Қасым-Жомарт Тоқаев.
