ҚР-да тұрақтандыру қорларына өнім сатып алуда шарттарды өзгертеді

Қазақстанда 8 айдың қорытындысы бойынша азық-түлік бағасының өсуі инфляцияны жеделдетуге әсер етіп, 11,4%-ға жетті. Бағаның өсуін бақылау үшін үкімет шикізат өндіруден бастап сауда саласының мониторингін цифрландыруға дейінгі барлық тізбектерді қадағалайтын шаралар кешенін бекітті.

Бүгін үкімет отырысында ауыл шаруашылығының бірінші вице-министрі Айдарбек Сапаров хабарлағандай, тұрақтандыру қорларының жұмыс істеу принципі қайта қаралады, жасалған болжам бойынша олар бағаның неғұрлым өсуі мүмкін деген тауарлардың түрлерін сатып алатын болады.

«Маусымаралық кезеңде тұрақтандыру қорларында қала халқының қажеттілігінен 30% көлемінде картоп, сәбіз, қырыққабат және пияз бен қарақұмық жармасының, күнбағыс майының (бөтелкедегі) бес айлық қорын жинап сақтау ұсынылады. Есептік деректер бойынша, республикада картоп пен көкөністерді сатып алу көлемі 229 мың тоннаны, сондай-ақ қарақұмық жармасы 17,6 мың тоннаны және күнбағыс майы 28,5 мың тоннаны құрайды», - деп хабарлады вице-министр.

Тақырыпқа байланысты оқу: Тамыз айында әлемдегі азық-түлік бағаларының қарқынды түрде өсуі тіркелді

Оның айтуынша, Азық-түлік корпорациясы дайын өнім алу үшін жоспарланған тұрақтандыру қорларының 10% мөлшерінде күнбағыс пен қарақұмықтың қосымша көлемін, сондай-ақ шамамен 4 мың тонна қант жинап, сақтайтын болады.

Форвардтық сатып алу бойынша Азық-түлік корпорациясы 9150 тонна күнбағыс пен 691 тонна қарақұмық сатып алды. Қарақұмық, күнбағыс пен қанттың қалған көлемі нарықта тікелей сатып алу бойынша алынады.

Бұдан басқа, шикізат базасын дамыту үшін Азық-түлік корпорациясы базасында тұрақты түрде сақталатын жемшөп қоры қалыптастырылады. Сондай-ақ ірі және жемшөп азықтарын әкетуге уақытша квоталар немесе тыйым салуға бағытталған Жемшөп өндірісін дамыту жөніндегі жол картасы әзірленетін болады.