70 млрд теңге 2022 жылы дала жұмыстарын несиелендіруге бағытталады

Үкімет Аграрлық несие корпорациясына 2022 жылы көктемгі егіс және егін жинау жұмыстарын жүргізуді қаржыландыруға 70 млрд теңге көлемінде бюджеттік несие бөледі. Қаражат бөлу туралы Үкімет қаулысының жобасы Ауыл шаруашылығы министрлігінің сайтында орналастырылған.

Құжатқа сәйкес, Аграрлық несие корпорациясының несиені игеру мерзімі Екінші деңгейдегі банктегі шотқа қаражат аударылған күннен басталып, 2022 жылдың 1 қарашасында аяқталады.

Бюджеттік кредит Аграрлық кредиттік корпорацияға мерзімділік, ақылылық және қайтарымдылық шарттарында 2022 жылғы 20 желтоқсанға дейінгі мерзімге жылдық 0,01% сыйақы мөлшерлемесі бойынша теңгемен беріледі.

Несиенің мақсатты және тиімді пайдаланылуын, өтелуі мен қызмет көрсетілуін бақылау және мониторингтеу Ауыл шаруашылығы министрлігі мен Қаржы министрлігіне жүктелген.

Ауыл шаруашылығы министрлігінің хабарлауынша, Аграрлық несие корпорациясы "Кең дала" бағдарламасы аясында агроөнеркәсіптік кешен субъектілерін несиелендіретін болады.

Естеріңізге сала кетейік: Аграрлық несие корпорациясы фермерлерден көктемгі егіс және егін жинау жұмыстарын қаржыландыруға өтінімдерді қабылдау мерзімін 1 желтоқсанға ауыстырды. Бюджеттік несиелерді игеру рәсімдерінің ұзақтығына байланысты өзгерістер енгізілді, осылайша фермерлер егіс жұмыстары басталғанға дейін қаражатты уақтылы ала алатын болады.