АШМ майлы дақылдарды және қарақұмықты қайта өңдеуге тапсырғаны үшін субсидия бөледі

Ауыл шаруашылығы министрлігі «Өсімдік шаруашылығы өнімінің шығымдылығы мен сапасын арттыруды субсидиялау ережесін бекіту туралы» бұйрыққа өзгерістер енгізді. Аталған түзетулер шикізаттың кейбір түрлерін қайта өңдеуге тапсыру үшін субсидиялар бөлуді қарастырады. Бұл туралы Ауыл шаруашылығы министрлігінің баспасөз қызметінен хабарлады.

«Аталған бұйрық ауыл шаруашылығы өндірушілеріне немесе қарақұмық және майлы дақылдар өндіретін кооперативтерге ағымдағы жылы және өткен жылдың төртінші тоқсанында кәсіпорындарға қайта өңдеуге жұмсалған шығындарды ішінара өтеуге субсидиялар төлеуді қарастырады», - деп хабарлады Ауыл шаруашылығы министрлігінде.

Бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Естеріңізге сала кетейік, ҚР-да майлы дақылдарды қайта өңдеу зауыттары шикізаттың жетіспеушілігінен толық қуатпен жұмыс істей алмауда. Атап айтқанда, «ЭФКО Алматы» ЖШС-ның өткен жылы өнімдерді өңдеу қуаттылығы бойынша жүктемесі небәрі 40% болған еді, ал PCD Group компаниясының қуаттылығы 15% -ды құрады. Екі компанияның зауыттары да соя өңдейді. Күнбағыс тұқымын қайта өңдейтін зауыттарда да жағдай осындай болуда.

Осыған байланысты қайта өңдеушілер экспорттық шектеулерді енгізуден бастап шикізатты отандық компанияларға қайта өңдеуге тапсыратын фермерлерге субсидиялар төлеуге дейін саланы қолдаудың әртүрлі тәсілдерін бірнеше рет ұсынды.

Қарақұмықты қайта өңдеушілер шикізаттың жетіспеушілігі туралы бұрын да хабарлаған болатын.