Алматыда корей технологиясы бойынша «ақылды» жылыжай соғылады

Қазақ ұлттық аграрлық университеті мен Оңтүстік Кореяның коммерцияландыру және ауылшаруашылық технологияларымен алмасу қоры Алматыдағы Аграрлық университет аумағында Оңтүстік Кореяның жаңа технологияларын қолдана отырып, ақылды жылыжай салуды көздейтін келісімге қол қойды. Бұл туралы «Хабар 24» хабарлады.

Аталған жылыжай технологиясы Оңтүстік Кореяда сәтті жұмыс істеуде, оның иесі, график дизайнер  Ким Ён Док бұл жаңалық туралы егжей-тегжейлі айтты. Ол төрт жыл бұрын ферма ісімен айналысуды бастаған. Алғаш бастаған сәтте қиын болған, бірақ ақылды технология арқылы жұмысы жеңілдей бастаған.

Жылыжайда егін жинау үшін тек екі жұмысшы ғана істейді. Ким Ён Доктың өзі ол жерде сирек болады, себебі жылыжайды ұялы телефон арқылы бақылайды. Мысалы, төбеде орналасқан басқару жүйесі арқылы жарық пен ылғалды реттеуге болады.

«Жылыжайдың ішіндегі қондырғылардың біреуі - температураны бақылайды. Екіншісі - күн сәулесінің мөлшерін қадағалайды: егер күн көп болса, онда перде түсіп,  көлеңке болады. Үшіншісі ылғалдылықты бақылайды: егер ол жоғары болса, перде ашылып, салқын ауа ішке кіреді», - дейді фермер.

Жылыжайда топырақтың орнына кокос қабығы қолданылады. Өсімдіктерге су - қоректік заттармен бірге енеді: оларды компьютер қосады және суды береді.

«Не себепті технологияны қолдану керек? Себебі, егер сіз қоректік ерітіндіні дұрыс қоспасаңыз, өсімдік ауруға шалдығады, тіпті егер қажетті қоректік заттар жетіспесе де өспей қалады. Мен бір рет қызанақ отырғызамын да, жыл бойы тек егін жинаймын. Жылдық пайда 250 мың долларға дейін жетеді», - деді Ким Ён Док.

Осындай 1,5 гектарлық жылыжай Қазақ аграрлық университетінің аумағында пайда болады. Бұл студенттер мен фермерлерді оқытуға қажетті алаң ретінде пайдаланылады.

«Біз Қазақстанда осы ақылды жылыжай жобасын екі жылда аяқтауды жоспарлап отырмыз. Мұнда қияр, қызанақ, құлпынай өсіреміз. Менің естуімше, Қазақстанда адамдар көкөністерге қарағанда етті көбірек жейді, сондықтан да, өкінішке орай, орташа өмір сүру ұзақтығы 60 жыл. Менің ойымша, қызанақ, қияр және құлпынай көбірек жегеннен кейін қазақстандықтар кәрістер сияқты 90 жылға дейін өмір сүре алады», - деді Пак Чул Ун, Агроөнеркәсіптік технологияларды коммерцияландыру және айырбастау қорының президенті.

Корей ғалымдарының пікірінше, жаңа технологиялар ауыл шаруашылығының дамуына көмектеседі. Қазақстандық фермерлер ішкі нарықты көкөністер мен жемістермен қамтамасыз етіп қана қоймай, сонымен қатар көрші елдерге ақылды фермалардың өнімдерін сата алады.