Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
2021 жылдан бастап тыңайтқышқа субсидия алу үшін агрохимиялық картограммалар қажет болады
26 мая 2020
Фермерлерге 2021 жылдан бастап тыңайтқыш субсидияалу үшін топыраққа агрохимиялық зерттеу жүргізу қажет болады. Бұл туралы бүгін үкіметтің отырысында Ауыл шаруашылығы министрі Сапархан Омаров мәлімдеді.
«2018 жылы тыңайтқыштарға субсидия алу үшін агрохимиялық картограммалар болуы талап етілді. Фермерлердің көптеген өтініштерін ескере отырып, бұл талап 2021 жылға дейін кейінге қалдырылды. Біз фермерлерді дайындауға 2 жыл уақыт бердік және топырақтың нақты агрохимиялық жағдайын ескере отырып, тыңайтқыштар қажет болған жағдайда ғана қолданылды», — деді Ауыл шаруашылығы министрлігінің басшысы.
Оның айтуынша, өткен уақыт ішінде Қазақстан Республикасында топыраққа агрохимиялық талдау жүргізу үшін қызмет көрсететін заманауи жоғары технологиялық жабдықтармен аккредитацияланған жаңа зертханалар ашылды.
С.Омаров облыс әкімдіктерін 2021 жылы және одан кейінгі жылдары да субсидия алу үшін агрохимиялық топырақ зерттеулерінің қажет болатындығы туралы фермерлерге айтып түсіндіру жұмыстарын жүргізу керектігін айтты.
Ауыл шаруашылығы министрлігінің мәліметінше, бүгінде Қазақстанда 2,5 млн тонна тыңайтқышқа деген қажеттілік бар болғанымен, тек 500 мың тоннаға жуық минералды тыңайтқыштар ғана енгізілген. 2020 жылы тыңайтқыштар үшін 26,2 млрд. теңге мөлшерінде субсидиялар қарастырылған, ал ағымдағы жылы республикалық бюджеттен 23,3 млрд. теңгеге қосымша 2,8 млрд. теңге бөлінді. Бұл шамамен 522 мың тонна минералды тыңайтқыштар алуға мүмкіндік береді, яғни өткен жылмен салыстырғанда 120 мың тоннаға көп.
26 мамырдағы мәлімет бойынша фермерлерге 395 мың тонна тыңайтқыш бөлініп берілді (жоспардың 76%), ал аймақтардағы қоймаларда қосымша 31,8 мың тонна бар.
«Тыңайтқыштарды қолданудың жүйелі динамикасы Қызылорда облысында байқалады, онда тыңайтқыштарды қолдану мөлшері ғылыми негізделген норманың 93%-ын құрайды, Солтүстік Қазақстан облысында — 36% және Түркістан облысында — 27%. Басқа аймақтарда тыңайтқыштарды қолдану деңгейі төмен, сондықтан барлық әкімдіктерге осы жағдайға ерекше назар аударып, жоғары өнім алу үшін тыңайтқыш алу көлемін арттыруды ұсынамыз», — деді Сапархан Омаров.
