Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
Ақмола облысында жылына 1 млн тонна бидай өңдейтін зауыт салынады
08:05
Астанада «Ақмола облысында астықты терең өңдеу зауытын салу» жобасы бойынша ҚР Үкіметі мен «Азия Алтын Дән» серіктестігі арасында Dalian Hesheng Holdings Group корпорациясының қатысуымен Инвестициялар туралы келісімге қол қою рәсімі өтті. Зауыт бірінші кезеңде жылына 1 млн тонна бидай өңдеу қуаты бар Қазақстан мен Орталық Азиядағы ең ірі зауыттардың біріне айналады. Бұл туралы ҚР Ауыл шаруашылығы министрлігінің баспасөз қызметі хабарлады.
Жобаның бастамашысы, Dalian Hesheng Holdings Group басқарма төрағасының орынбасары Ю Юфэй айтып өткендей, жобаны іске асырудың бірінші кезеңінде 500 мың тоннаға дейін натрий глутаматын, 300 мың тоннаға жуық жоғары құнды бидай глютенін, сондай-ақ жемшөп пен ілеспе өнімдерді шығару жоспарлануда.
«Біздің компания үшін Қазақстан — аграрлық әлеуеті жоғары әрі инвестициялық ахуалы қолайлы стратегиялық серіктес. Бұл жобаның жүзеге асырылуы халықаралық өнеркәсіптік ынтымақтастықтың табысты үлгісіне айналып, әлемдік деңгейдегі бәсекеге қабілетті өнім шығаруға және жаһандық нарықтарға шығуға жаңа мүмкіндіктер ашады», — деді инвестор.
Жоба Ақмола облысы Аршалы ауданындағы инвестициялық аймақта «Азия Алтын Дән» серіктестігі тарапынан жүзеге асырылуда.
Ауыл шаруашылығы министрлігі астық құрамындағы крахмалдың 100%-на дейін өңдеуге мүмкіндік беретін бірегей биоферментация технологиясы бар Dalian Hesheng Holdings Group-пен ынтымақтастықтың арқасында жобаның стратегиялық маңызы бар екенін атап өтті. Дәстүрлі тәсілдерде крахмалдың 50%-дан аспайтын бөлігі ғана пайдаланылса, бұл технология шикізатты барынша тиімді өңдеуді қамтамасыз етеді. Компанияның бидай мен жүгеріні терең өңдеудегі 40 жылдан астам тәжірибесі қазақстандық өнімнің әлемдік нарықтардағы бәсекеге қабілеттілігін арттыруға ықпал етеді.
Келісім аясында тараптардың өзара міндеттемелері қарастырылған. Инвестор қазақстандық мамандарды үздіксіз оқыту жүйесін енгізіп, жыл сайын кемінде 40 жергілікті қызметкердің біліктілігін арттыруды қамтамасыз етеді. Сонымен қатар әлеуметтік инфрақұрылымды дамыту, оның ішінде спорт кешенін салу, білім беру, мәдениет, бұқаралық спорт және жастар саясаты салаларындағы жобаларға қатысу көзделген.
Өз кезегінде Қазақстан Үкіметі жобаға қажетті қолдау көрсетеді. Атап айтқанда, салықтық және кедендік жеңілдіктер беру, сондай-ақ заңнамада белгіленген тәртіппен мемлекеттік қолдаудың өзге де шараларын ұсыну қарастырылған.
«Мемлекет басшысы ауыл шаруашылығы өнімдерін өңдеу үлесін 70%-ға дейін жеткізу, сондай-ақ 10 жыл ішінде астықты терең өңдеу өнімдерін өндіру және экспорттау бойынша әлемнің жетекші он елінің қатарына кіру міндетін қойды. Біз шикізаттық модельден жоғары қосылған құны бар терең өңдеу экономикасына кезең-кезеңімен көшіп келеміз. Қазіргі таңда Қазақстанда қуаттылығы 510 мың тоннаны құрайтын үш астықты терең өңдеу кәсіпорны жұмыс істейді. Олар крахмал, глютен, сірне, биоэтанол және басқа да өнімдер шығарады. Бұл жобаны іске асыру бидайдың едәуір көлемін өңдеумен қатар, жаңа экспорттық бағыттарды қалыптастыруға және озық технологияларды енгізуге мүмкіндік береді», — деді ҚР ауыл шаруашылығы министрі Айдарбек Сапаров.
Ауыл шаруашылығы министрлігінің мәліметі бойынша, Қазақстанда ауыл шаруашылығы өнімдерін өңдеу үлесін арттыру және астықты терең өңдеу өнімдерін әлемдік нарықтарға шығару үшін қуаттылығы 5,8 млн тонна және құны 4,0 млрд АҚШ долларын құрайтын алты ірі жоба жүзеге асырылуда.
