Қытай бұқашықтарды Қазақстаннан әкелуге рұқсат береді

Фото көзі: ElDala.kz

Қазақстанның Ауыл шаруашылығы министрлігі мен Қытайдың Бас кеден басқармасы Қазақстаннан Қытайға сою үшін экспортталатын тірі ірі қара малға қойылатын ветеринариялық талаптар және жануарлардың денсаулығын қорғау жөніндегі хаттамаға қол қойды. Құжатқа Қазақстан президенті Қасым-Жомарт Тоқаев пен Қытай Төрағасы Си Цзиньпиннің келіссөздерінің қорытындысы бойынша қол қойылды. Бұл туралы Ақорданың баспасөз қызметі хабарлады.

Ауыл шаруашылығы министрлігі атап өткендей, ведомство ҚХР ет қауымдастығымен ынтымақтасуға ниетті. Қазақстан-Қытай Іскерлік кеңесінің 7-ші отырысы аясында ет өнеркәсібінде Қытай ет қауымдастығымен техникалық алмасу және ынтымақтастық туралы негіздемелік келісімге қол қойылды. Құжат Қазақстан мен Қытай арасындағы өзара іс-қимылды тереңдетуге, өнім сапасын жақсарту және екі елдің тауар айналымын ұлғайту үшін ет өнеркәсібі саласындағы технологиялармен алмасуға бағытталған.

Қытай ет қауымдастығы - бұл ұлттық қоғамдық ұйым, оның құрамына ет өнеркәсібі кәсіпорындары, мемлекеттік мекемелер, ҚХР қоғамдық ұйымдары кіреді.

CMA мүшелігі мал шаруашылығы, сою, ет өңдеу, ет салқын тізбегі логистикасы, ет импорты мен экспорты, ет өңдеу машиналары мен жабдықтары, ет және ет өнімдерінің ингредиенттері, ет және ет өнімдеріне арналған орауыш материалдары және сонымен қатар институттар мен колледждер, провинциялық және муниципалдық азық-түлік компаниялары, аймақтық ет бірлестіктері сияқты ет өнеркәсібінің барлық тізбегін қамтиды.

Бұдан басқа, ҚР Ауыл шаруашылығы министрлігі мен Suzhou Eavision Robotic Technologies Co компаниясы арасындағы техникалық ынтымақтастық туралы құжатқа қол қойылды, ол интеллектуалды ұшқышсыз ұшу аппараттары мен күрделі сыртқы жағдайларға жарамды интеллектуалды роботтарды әзірлеумен және өндірумен айналысады. Eavision ақылды машиналары, жабдықтары мен бағдарламалық жасақтамасы көптеген салаларда, соның ішінде ауыл шаруашылығында қолданылады.

«Компаниямен келісім өсімдіктерді қорғау үшін интеллектуалды дрондарды енгізуді қарастырады. Мұндай жабдықты пайдалану өсімдіктерді қорғау жөніндегі іс-шаралардың, сондай-ақ жалпы ауыл шаруашылығы өндірісінің тиімділігін арттыруға мүмкіндік береді», - деп атап өтті АШМ.