Ақпан айында Қазақстанда қандай ауа райы күтіледі

Фото көзі: ElDala.kz

Ақпан айында Қазақстанның басым бөлігінде ауаның орташа температурасы нормадан 1-2° жоғары болады деп күтілуде. Бұл туралы Қазгидрометтің ауа райы болжамында айтылған.

Ауа температурасы нормаға жақын Шығыс Қазақстан облысында, Алматы және Жетісу облыстарының оңтүстік-шығыс жартысында, Түркістан, Жамбыл және Абай облыстарының таулы және тау бөктеріндегі аудандарында болжанады.

Синоптиктердің мәліметінше, ақпан айында республиканың көптеген облыстарында жауын-шашын мөлшері климаттық нормаға жақын, тек Атырау облысында, Қостанай облысының солтүстік жартысында, елдің оңтүстік және оңтүстік - шығысындағы таулы және тау бөктеріндегі аудандарда - нормадан көп болады деп болжануда.

Ақпан айында күндізгі уақыттың ұзақтығы орта есеппен 2-3 сағатқа артады. Оңтүстік аймақтарда ауаның орташа тәуліктік температурасы 0° арқылы оң мәндерге ауысады.

Тұман мен көктайғақ құбылыстары қаңтарға қарағанда жиі байқалады.

Болжам бойынша ақпанның бірінші онкүндігінің басында және соңында Қазақстан Республикасы аумағының басым бөлігінде белсенді циклондармен қар, боран күтіледі, оңтүстік өңірлердің таулы аудандарында кейде қатты қар жауады, бірінші онкүндіктің ортасында жауын-шашын жаңбыр мен ылғалды қар түрінде болады деп болжанады. Тұрақсыз ауа-райы тұманмен, көктайғақ құбылыстарымен және секундына 15-28 метрге дейін желдің күшеюімен бірге жүреді. Ақпанның бірінші онкүндігінің ортасында Қазақстанның үлкен аумағында ауа температурасы көтеріледі деп күтілуде:

• батыс облыстарда: түнде -3-14°С-тан -5+3°С-қа дейін, күндіз 0,-5°С-тан -3+5°С-қа дейін;
• солтүстік және орталықта: түнде -10-23°С-тан -3-10°С-қа дейін, күндіз -5-15°С-тан -5+2°С-қа дейін;
• республиканың шығысында: түнде -10-25°С-тан -2-10°С-қа дейін, күндіз -2-12°С-тан -2+3°С-қа дейін;
• оңтүстік облыстарда: түнде -8-15°С-тан -3+3°С-қа дейін, күндіз -8+3°С-тан +5+13°С-қа дейін.

Бірінші онкүндіктің соңында елдің солтүстік-батысында, содан кейін ҚР қалған аумағында температуралық фонның төмендеуі болжанады.

Қыстың соңғы айының екінші және үшінші онкүндіктерінде көптеген аймақтарда аяз ерігенмен ауысады.

Республиканың солтүстігінде температура фонының ауытқуы түнде-3-12°С-тан-15-25°С-қа дейін, күндіз -5+3°С-тан-8-13°С-қа дейін, оңтүстік жартысында түнде-9-14°С-тан -8 + 3°С-қа дейін, күндіз -1-6°С-тан +7 + 15°С-қа дейін болады.