Ауыл шаруашылығы министрлігі мал шаруашылығы мен өңдеуге 5%-бен несие беруді ұсынады

Фото көзі: ElDala.kz

Қазақстанда дала жұмыстарын жеңілдетілген несиелендіруге 2024 жылы жылдық 5% мөлшерлеме бойынша 580 млрд теңге бөлінді, ал 2025 жылы қаржыландыруды 700 млрд теңгеге дейін ұлғайту жоспарлануда. Ауыл шаруашылығы министрлігі мұндай шарттармен несиелеуді агробизнестің басқа салаларына да қолдану керек деп санайды. Бұл туралы Ауыл шаруашылығы министрі Айдарбек Сапаров Сенаттағы азық-түлік қауіпсіздігі тақырыбындағы парламенттік тыңдау барысында мәлімдеді.

«Қазіргі уақытта жеңілдетілген қарыз қаражаты тек көктемгі егіс және егін жинау жұмыстарына жіберіледі. Алайда, 5% жеңілдікті мөлшерлемесі бар мұндай құралдарды аграрлық сектордың басқа да негізгі бағыттарына қолдану қажет деп санаймыз. Мал шаруашылығын, ауыл шаруашылығы өнімдерін, оның ішінде тері мен жүнді қайта өңдеуді, сондай-ақ саланың инвестициялық бағыттарын дамытуды қолдау ерекше маңызды. Бұл бастамаларды іске асыру азық-түлік қауіпсіздігін нығайтудағы маңызды қадам болады және ауылдық аумақтарды дамытуға қосымша серпін береді. Біз бастамаларымызды ілгерілетуге қолдау көрсетеміз деп үміттенеміз», - деді Айдарбек Сапаров депутаттарға.

Ол сондай-ақ биылғы жылы егіс жұмыстарын жеңілдетілген қаржыландыру қараша айының соңында басталғанын хабарлады. Бүгінгі таңда 695 ауыл шаруашылығы өндірушілерінен 85 млрд теңгеге өтінімдер пулы қалыптастырылды.

Сонымен қатар, Ауыл шаруашылығы министрлігінің басшысы Қазақстанның әлемдік азық-түлік нарықтарындағы ұстанымын нығайту үшін көлік инфрақұрылымын жаңғыртуға және кеңейтуге көңіл бөлу өте маңызды екенін атап өтті.

«Ауыл шаруашылығы өнімдерін халықаралық нарықтарға экспорттау үшін уақтылы көлік қатынасын қамтамасыз етуге ерекше назар аудару қажет. Сондай-ақ, авиатасымалдау кезінде қазақстандық өнім экспортының басымдығы үшін жағдай жасау қажет», - деді Айдарбек Сапаров.