Қазақстанда топырақ бонитетін анықтау бойынша ауқымды зерттеулер жүргізілуде

Фото көзі: МСХ РК

«ГИПРОЗЕМ» республикалық мемлекеттік кәсіпорны 2024 жылы 6 млн га аумақта топырақ зерттеуін және 7 млн га аумақта геоботаникалық зерттеу жүргізді. Алынған мәліметтер негізінде электронды топырақ және геоботаникалық карталар жасалды. Бұл туралы ҚР Ауыл шаруашылығы министрлігінің баспасөз қызметі хабарлады.

Сонымен қатар, ағымдағы жылы 8 млн гектар жерге мониторинг жүргізіліп, 4 млн гектар жерге топырақ бонитеті анықталды.

“Бұл деректер жерді ұтымды пайдалану жөніндегі ұсыныстарды дайындау үшін негіз болды. Ауыл шаруашылығы өндірушілеріне топырақ құнарлылығын арттыру, эрозияны болдырмау, оңтайлы ауыл шаруашылығы дақылдарын таңдау бойынша шаралар, сондай-ақ тыңайтқыштар енгізу бойынша ұсыныстар ұсынылды", - деп атап өтті Ауыл шаруашылығы министрлігінде.

2025 жылы «ГИПРОЗЕМ» РМК өз жұмысының ауқымын ұлғайтуды жоспарлап отыр. Атап айтқанда, топырақты зерттеу 6,65 млн гектарға, геоботаникалық зерттеу 7,5 млн гектарға жүргізіледі. Топырақ бонитеті 5 млн гектарға анықталады, мониторингпен 10 млн гектар жер қамтылады. Жердің тозуының электрондық карталары 53,5 млн га алқаптан құрылатын болады.

Ағымдағы жылы кәсіпорын бірқатар халықаралық жобаларға белсенді қатысты. Атап айтқанда, БҰҰ-ның шөлейттенуге қарсы күрес жөніндегі Конвенциясы шеңберінде Орталық Азияның жер ресурстары бойынша Өңірлік шолуды дайындау бойынша жұмыс жалғасуда.

COP 29 аясында Бакуде көміртекті егіншілік тақырыбы бойынша сайд-ивент ұйымдастырылды, кәсіпорынның қызметі таныстырылды.

Эр-Риядта COP16-ға қатысу маңызды оқиға болды, онда «ГИПРОЗЕМ» РМК Климаттың өзгеруі жағдайында жер ресурстарын тұрақты басқару мәселелеріндегі Қазақстанның жетістіктерін ұсынды.

Save Soil қозғалысы аясында топырақтың денсаулығын сақтау бойынша бірлескен қызмет туралы Conscious Planet-пен меморандум жасалды. Сондай-ақ UFU Тәуелсіз қоршаған орта институтымен (Германия) келісімге қол қойылды.

Бұдан басқа, БҰҰ-ның ҚР-дағы Азық-түлік және ауыл шаруашылығы ұйымымен ынтымақтастықта бірқатар жобалар жүргізілуде.