Жамбыл облысында 245 млрд теңгеге АӨК жобалары іске қосылады

Фото көзі: ElDala.kz

Жамбыл облысында 2024 жылдан 2027 жылға дейін агроөнеркәсіптік кешен саласында 245,4 млрд теңге сомасына 36 жобаны іске асыру жоспарлануда. Бұл туралы өңірдің ауыл шаруашылығы басқармасының баспасөз қызметі хабарлады.

Оның ішінде бес сүт-тауар фермасы, үш құс фабрикасы, сегіз көкөніс қоймасы, ауыл шаруашылығы өнімдерін қайта өңдеу бойынша 10 жоба, су үнемдеу технологияларын енгізу бойынша жеті жоба, сондай-ақ бордақылау алаңын салу.

Бұдан басқа, балық шаруашылығын дамыту, техникаға қызмет көрсету жөніндегі сервистік желіні құру жөніндегі жобалар іске асырылатын болады.

Сондай-ақ, СҚО тәжірибесін тираждау бағдарламасы аясында 15 инвестициялық жоба қаржыландырылды: көкөніс сақтау қоймасы мен сүт-тауар фермасын салу, алма шырынын, балық азығын өндіру, құстың нәжісі мен қой жүнін өңдеу, су үнемдеу технологияларын енгізу. Жергілікті бюджет қаражаты есебінен фри картобын өндіру, теріні жемшөп қоспасына өңдеу бойынша жобаларды іске асыру жоспарлануда. Жоспарға сәйкес, бірқатар жобалар жыл соңына дейін іске қосылады.

«Бұл жобалар өңірде сүт өндірісін 6,5%-ға ұлғайтуға, ауыл шаруашылығы қоймаларының сыйымдылығын 10%-ға арттыруға мүмкіндік береді, сондай-ақ бағаны тұрақтандыруға және тұрақты жұмыс орындарын құруға ықпал етеді», - деп атап өтті басқармада.

Ағымдағы жылы 14,6 млрд теңгеге 16 инвестициялық жобаны іске асыру жоспарлануда. Бүгінгі таңда 12 жоба (10,8 млрд теңге)  іске қосылды, 163 жұмыс орны құрылды.

«Алель-Агро» АҚ инкубаторды іске қосты, бес шаруа қожалығы су үнемдеу технологияларын енгізді, мақсары майы өндірісі ұлғайды. Сондай-ақ, «КазАква Альянс» ЖШС балық шаруашылығы ашылды, «Эльнур Әділгрупп» ЖШС астық қоймасы салынды. «BNK Leasing» ЖШС ауыл шаруашылығы техникасына қызмет көрсету орталығын ашты, «Рич голд» ЖШС алма шырынын өндіруді іске қосты, «Кәусар» шаруа қожалығының көкөніс қоймасының құрылысы аяқталды», - деп хабарлады ведомствода.