Қайрат Айтуғанов Ауыл партиясының төрағасы болып сайланды

«Ауыл» партиясының кезектен тыс съезі 23 маусымда өтті, оның барысында Серік Егізбаев төрағаның өкілеттігін тоқтату туралы жариялады.

Ол партияға аграрлық және әлеуметтік күн тәртібіне жаңа көзқарастар енгізу, жаңартылған саяси жүйеде тиімді жұмыс істеу қажеттігін атап өтті.

«Сондықтан, менің партия төрағасы қызметінен кету туралы шешімім партияның ішкі динамикаға дайындығын және алдағы сайлауға жаңа саяси жүйеде толыққанды қатысу ниетін көрсететін орынды қадам болмақ. Сонымен қатар, мен партияның мақсаттарына адалмын және оның қатарында белсенді жұмыс жүргізуге ниеттімін», - деді Серік Егізбаев.

Суретте: Серік Егізбаев

Ол Съездің қарауына партия төрағасының орынбасары Қайрат Айтуғановтың партия төрағасы лауазымына кандидатурасын ұсынды.

Қайрат Қапарұлы - аграрлық экономикада, мемлекеттік қызметте және ғылыми салада қырық жылдан астам жұмыс өтілі бар жоғары білікті басшы, экономист және мемлекет қайраткері. Әр жылдары ол ҚР ауыл шаруашылығының бірінші вице-министрі, аппарат басшысы, Халықаралық қайта құру және даму банкі жүзеге асыратын жобаның басшысы, «Оңтүстік» әлеуметтік-кәсіпкерлік корпорациясы» ұлттық компаниясы» АҚ басқарма төрағасы, Қарағанды ​​облысы әкімінің орынбасары, «ҚазАгро» ұлттық басқарушы холдингі» АҚ басқарма төрағасының орынбасары және «ҚР Кәсіподақтар федерациясы» республикалық қоғамдық бірлестігі төрағасының орынбасары қызметтерін атқарды.

Сонымен қатар, ол «Ұлттық аграрлық ғылыми-білім беру орталығы» КЕАҚ директорлар кеңесінің төрағасы, сондай-ақ С.Сейфуллин атындағы Қазақ агротехникалық университетінің басқарма төрағасы болды.

Суретте: Қайрат Айтуғанов

«Ауыл» партиясы төрағасының орынбасары лауазымында ол ауылдық аумақтарды дамытуға бағытталған заңнамалық және бағдарламалық бастамаларды әзірлеуге және ілгерілетуге белсенді қатысты.

Съезд делегаттары Қайрат Айтуғановтың «Ауыл» партиясының жаңа төрағасы болып сайлануын бірауыздан қолдады.

Серік Егізбаевтың айтуынша, жаңа төраға партия жұмысында сабақтастықты қамтамасыз ету және партия алдында тұрған міндеттерді іске асыруды үйлестіру үшін үлкен әлеуетке ие.