Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
Жетісуда қант зауыттарын жаңғыртуға 54 млрд теңгеден астам инвестиция салынады
09:15
Ақсу және Көксу қант зауыттарын жаңғыртуға 54 млрд теңгеден астам инвестиция салу жоспарланып отыр. Нәтижесінде кәсіпорындардың өндірістік қуаты 950 мың тоннаға дейін артады. Бұл туралы Жетісу облысы әкімдігінің баспасөз қызметі хабарлады.
Атап айтқанда, Ақсу қант зауытының өндірістік қуатын 450 мың тоннаға, ал Көксу қант зауытының қуатын 500 мың тоннаға дейін ұлғайту көзделген.
Облыс әкімдігінің мәліметінше, 2026 жылы өңірде қант қызылшасы мен қант құрағынан шамамен 101 мың тонна қант өндіру жоспарланып отыр.
Қазақстанда қант импортына тәуелділік деңгейі әлі де жоғары. Бәсекелестікті қорғау және дамыту агенттігінің дерегінше, 2025 жылдың қорытындысы бойынша ел нарығындағы импорттық қанттың үлесі 70,4%-ға жеткен. Ішкі нарықты қантпен қамтамасыз ету мақсатында елімізде 2022–2026 жылдарға арналған қант саласын дамытудың кешенді жоспары іске асырылып жатыр. Құжатта салаға инвестиция тарту да көзделген. 13 қазанда өткен брифингте премьер-министрдің орынбасары – ұлттық экономика министрі Серік Жұманғарин қант саласында ішкі нарықты толық қамтамасыз етуге бағытталған шаралар қабылданып жатқанын айтты. Олардың қатарында жұмыс істеп тұрған зауыттарды жаңғырту және жылдық қуаты 250 мың тонна болатын жаңа кәсіпорын салу бар.
