KazAgroFarm-да әмбебап агро-автопилот ұсынылды

Азамат Ахметов
Фото көзі: ElDala.kz

Rostselmash – Қазақстандағы ауыл шаруашылығы техникасын жеткізуші ірі компаниялардың бірі. Компанияның Көкшетауда өз өндіріс орны бар. Жыл сайын күзде өтетін KazAgroFarm көрмесіне қатысу компания үшін игі дәстүрге айналған. Бұл алаң клиенттермен кездесуге және жаңа техникаларды Қазақстанның барынша көп аграршыларына таныстыруға мүмкіндік береді.

Биыл да компания көрмеге жаңалығын ала келді. Ол – ауыл шаруашылығы техникасын басқаруға арналған электрлі автопилот. Осы агронавигациялық жүйе туралы Rostselmash компаниясының негізгі клиенттермен жұмыс жөніндегі директордың орынбасары Азамат Ахметов айтып берді.

«Біздің стендтен қазақстандық фермерлерге жеткізіліп жатқан техникаларды көзбен көріп, танысуға болады. Атап айтқанда, мұнда екі барабанды Т500 комбайны ұсынылған. Бұл – өнімділігі жоғары, алтыншы класты машина. Сондай-ақ 600-ден 1 200 басқа дейін сиыры бар шағын фермаларға арналған F1300 жемшөп жинайтын комбайны бар. Алайда бұл ғана емес, жаңа техника да бар. Біздің компания бір орында тұрмайды, нарықтағы үрдістерге сай дамып келеміз. Сондықтан көрмеге агроавтопилот алып келдік. Бұл – Rostselmash пен «Итэлма» компанияларының бірлескен жобасы. Бұл навигациялық жүйенің ерекшелігі – ол спутниктердің барлығымен жұмыс істейді», – деді Азамат Ахметов.

Агроавтопилотты ISOBUS стандартталған байланыс хаттамасы арқылы әлемнің кез келген өндірушісі шығарған техникаға орнатуға болады. Ол тракторларға, комбайндарға және бүріккіштерге орнатылады.

Агроавтопилот дифференциалды себу жұмыстарын жүргізуге, сондай-ақ тыңайтқыштарды саралап енгізуге мүмкіндік береді. Егер бұл навигациялық жүйе бүріккішке орнатылса, ол жұмыс ерітіндісін де саралап шашуға мүмкіндік береді. Мұндай мүмкіндіктер қазіргі аграрлық өндірістің талаптарына сай келеді.

Еске сала кетейік, KazAgroFarm-2026 көрмесі елордадағы EXPO көрме орталығында өтіп жатыр. Кіру тегін.