Ұлттық банк базалық мөлшерлемені 15,75%-ға дейін төмендетті

Фото көзі: ElDala.kz

Қазақстан Ұлттық Банкінің Ақша-кредит саясаты комитеті базалық мөлшерлемені жылдық 16,25%-дан 15,75%-ға дейін төмендетті. Пайыздық дәліз +/- 1 пайыздық тармақ деңгейінде белгіленді. Бұл туралы қаржы реттеушісі хабарлады.

Мұндай шешім инфляцияның төмендеу үрдісінің жалғасуына байланысты қабылданды. 2026 жылғы қыркүйекте жылдық инфляция 9,3%-ға дейін баяулап, осымен қатарынан он екінші ай төмендеді.

Азық-түлік инфляциясы бұрынғы 9,5%-дан 8,5%-ға, азық-түлікке жатпайтын тауарлар инфляциясы 11,4%-дан 11%-ға дейін төмендеді. Ал қызметтер инфляциясы 8,9% деңгейінде сақталды.

Халықтың алдағы бір жылға арналған инфляциялық күтулері қыркүйекте тамыздағы 12,1%-дан 11,8%-ға дейін азайды. Нарық қатысушылары да 2026 жылдың соңындағы инфляция болжамын 10%-дан 9,5%-ға, ал 2027 жылға арналған болжамды 8,5%-дан 8,3%-ға дейін қайта қарады.

Ұлттық банктің мәліметінше, жылдық инфляция мен инфляциялық күтулердің төмендеуі базалық мөлшерлемені азайтуға мүмкіндік берген.

Сонымен қатар баға қысымы әлі де жоғары, ал тәуекелдер теңгерімі инфляцияның өсуі жағына қарай ойысқан.

Реттеуші ішкі тәуекелдер қатарына бюджет және квазибюджеттік ынталандыру шараларын, инфляциялық күтулердің жоғары деңгейін, жанар-жағармай бағасының және реттелетін тарифтердің өзгеруін жатқызады. Сыртқы тәуекелдер әлемдік энергия ресурстары мен азық-түлік бағасының жоғары болуына, сауда серіктес елдердегі инфляцияның өсуіне және жаһандық қаржыландыру шарттарының қатаңдауына байланысты.

Жедел деректерге сәйкес, 2026 жылғы қаңтар-қыркүйек аралығында Қазақстанның жалпы ішкі өнімі (ЖІӨ) 4,2%-ға өсті. Негізгі капиталға салынған инвестициялар 7%-ға, ал бюджет қаражатын есептемегенде шикізаттық емес секторға салынған инвестициялар 25%-ға артты.

Ұлттық банк жыл соңына қарай 2025 жылы реттелетін тарифтер бойынша қалыптасқан төмен салыстыру базасының әсерінен жылдық инфляцияның біршама жеделдеуі мүмкін екенін ескертті.

Реттеуші 2026 жылдың соңына дейін базалық мөлшерлеменің өзгеру ықтималдығын төмен деп бағалайды. Оны одан әрі төмендету мүмкіндігі баға қысымының тұрақты түрде әлсіреуіне байланысты болады.

Базалық мөлшерлеме бойынша келесі жоспарлы шешім 2026 жылғы 4 желтоқсанда жарияланады.