Қазақстанда жүнді экспорттаудағы баж салығы алынып тасталды

Қазақстандағы Сауда және интеграция министрлігінің бұйрығымен 2023 жылдың 30 сәуіріне дейін жүнді сату кезіндегі кедендік салық алынып тасталды.

Бұған дейін өнімді сыртқа шығару кезінде жүн құнының 10% - салық ретінде төленетін.

Аталған бұйрық бойынша келесідей өнімдер қамтылды: малдың таралмаған биязы жүні немесе қылшықтары; иірілмеген жүн қалдықтары, ыдыратылған шикізатты қоспағанда, малдың немесе жануарлардың биязы жүні немесе қылшық қалдықтары, жануарлар жүнінен немесе қатты түгінен жұлынған шикізаттар.

2023 жылғы 1 мамырдан бастап экспорттық баж салығы қайтадан 10%  болады, бірақ 1 тонна үшін 50 евродан кем емес.

Тақырыпқа байланысты оқуСемейде 10 жыл тұрып қалған тері зауыты өнімдерін қайтадан экспортқа шығара бастайды

«Атамекен» Ұлттық кәсіпкерлер палатасынан хабарлағандай, Шымкенттің фермерлері мен қой жүнін өндірушілер бұған дейін олардың өнімдері ел ішінде сатылмайтын, оның себебі экспорттық баж әсер етіп, бәсекеге қабілетсіз болып қалды деп шағымданды.

«Қой жүнін өңдейтін «Шымкент Кашемир» ЖШС жылына 10 мың тоннадан астам өнімді қайта өңдеуге мүмкіндігі бар. Алайда, ол тек бір мың тонна  ғана шығаруға мәжбүр. Компанияның өнімі негізінен Қытай нарығына жіберілетіндіктен, тауарға төленетін кедендік баж  салығы ҚХР- ға экспортты тиімсіз етеді. Бүгінгі күнге дейін кәсіпорын өз өндірісінде дайын өнім шығару үшін жуылған жүннің 1% - ын (10 тонна) ғана пайдаланады. Сонымен қатар, кәсіпорын қоймасында 1000 тоннадан астам жуылған жүн дайындалды, алайда мекеме өз жұмысын тоқтатты, кредиторлар алдындағы міндеттемелер негізгі борышты уақтылы төлемегені үшін өсімпұлдар мен айыппұлдарды төлеуге міндеттейді. Кедендік баж салығы өнім экспортына қауіп төндіріп қана қоймай, жүн өңдейтін жалғыз ірі кәсіпорынның жұмыс істеуіне мүмкіндік бермей отыр», - деді Шымкент кәсіпкерлер палатасының директоры Нұрлан Қабыштаев.

Кәсіпкерлер палатасының ақпараты бойынша, бұл мәселе 2019 жылдан бастап көтерілуде. Аталған шешімді шығарардан бұрын көптеген жұмыс жүргізілді: мемлекеттік органдармен хат алмасу және ұзақ талқылау, саланың өкілдерімен  отырыстар жүргізу, ведомствоаралық комиссияда қаралды.

Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.