Ауылшаруашылығы министрлігі инвестициялық субсидиялау қағидаларына өзгерістер енгізді

Ауыл шаруашылығы министрі Ербол Қарашөкеев 2018 жылғы 23 шілдедегі "Инвестициялық салымдар кезінде агроөнеркәсіптік кешен субъектісі шеккен шығыстардың бір бөлігін өтеу бойынша субсидиялау қағидаларын бекіту туралы" бұйрығына түзетулерге қол қойды.

Субсидиялаудың жаңа ережелері "АӨК-дегі инвестициялық жоба" түсінігін кеңейтеді. Бұл жобалар паспорттарына сәйкес жаңа өндірістік қуаттылықтар құруға немесе жұмыс істеп тұрғандарын кеңейтуге (оның ішінде жаңғыртуға), техника, машиналар мен жабдықтар сатып алуға инвестициялар салуды көздейтін іс-шаралар кешені.

Сондай-ақ, ережелерге 13-1 тармағы қосылды:

"13-1. Қызметін бірлескен кәсіпкерлік түрінде жүзеге асыратын шаруа немесе фермер қожалығынан № 1 және № 1.1 жобалардың паспорттары бойынша өтінім берген жағдайда, шаруа немесе фермер қожалығының мүшесіне тіркелген, сатып алынған техникаларға және (немесе) машиналарға субсидия беруге жол беріледі.

Бұл ретте, шаруа немесе фермер қожалығындағы мүшелік Қазақстан Республикасы Қаржы министрлігі Мемлекеттік кірістер комитетінің деректерімен салыстыру арқылы расталады."

Жергілікті бюджет есебінен жобалардың келесі паспорттары бойынша инвестициялық салымдарды өтеу үлесі ұлғаюы мүмкін:

• 35%-ға дейін: №1 "ауыл шаруашылығы техникасын, машиналар мен жабдықтарды сатып алу" және № 1.1 "Сұранысқа ие ауыл шаруашылығы техникасын сатып алу" жобаларының паспорттары бойынша-негіздемелерін көрсете отырып, облыстардың аумақтарын дамыту бағдарламаларында көзделген техниканың, машиналар мен жабдықтардың басым түрлері бойынша;
• 40%-ға дейін: №6 "Сүтті бағыттағы ірі қара малды/ешкілерді өсіруге арналған объектілерді құру және кеңейту" және №14 "5 гектардан бастап жеміс-жидек дақылдары мен жүзім отырғызу" жобаларының паспорттары бойынша;
• 50% дейін: № 1 "Ауыл шаруашылығы техникасын, машиналары мен жабдықтарын сатып алу" жобасының паспорты бойынша бірқатар позициялар бойынша; № 1.1 "Сұранысқа ие ауыл шаруашылығы техникасын сатып алу" жобасының паспорты бойынша ауыл шаруашылығы кооперативтері үшін № 8 "Сүт өңдеу объектісін құру және кеңейту, сүт қабылдау пункттерін құру, ауыл шаруашылығы кооперативтері, дайындау ұйымдары, сүт қабылдау пункттері және сүт өңдеу кәсіпорындары үшін жабдықтар мен техника сатып алу" жобасының паспорты бойынша ауыл шаруашылығы кооперативтері үшін.

Бұл ретте бір кооператив сатып алынған (сатып алынатын) техникаға, машиналар мен жабдықтарға: тіркемелі және аспалы жабдықтың тиісті саны бар үш тракторға; екі астық жинайтын комбайнға және аспалы және тіркемелі жабдықтың тиісті санына; ауыл шаруашылығы мақсатындағы жүктерді тасымалдауға арналған екі автомобильге және өзі аударғыш тіркемеге дейін инвестициялық субсидиялар ала алады.

Тақырып бойынша оқу: Аграрлық сектор 2022 жылы 303 млрд теңгеге субсидия бөледі

Инвестициялық субсидия алуға өтінімдерді қабылдау инвестициялық жобаны іске асыру орны бойынша тиісті жылдың 1 ақпанынан 15 желтоқсанына дейін, ал жайылымдарды суландыру және мал шаруашылығы шаруашылықтарын сумен қамтамасыз ету инфрақұрылымын (құдықтар, ұңғымалар) құруға - тиісті жылдың 1 сәуірінен 1 қазанына дейін жүзеге асырылады. Өтінімдер келіп түскен күні мен уақытына сәйкес кезектілік бойынша қаралады.

Сондай-ақ, қағидалар инвестициялық субсидиялау шарттарын резервке (күту парағына) енгізуді көздейді. Күту парағындағы шарттар бойынша субсидиялар төлеу ағымдағы қаржы жылында қосымша бюджет қаражаты бөлінген кезде Шарттың келіп түскен күні мен уақытына сәйкес кезектілік бойынша жүзеге асырылатын болады. Ал қаражат болмаған жағдайда - келесі қаржы жылында.

Бұйрық 2022 жылғы 1 қаңтардан бастап қолданысқа енгізіледі.