Қазақстан Моңғолияға ауыл шаруашылығы өнімдерін бажсыз жеткізе алады

Фото көзі: ЕЭК

Еуразиялық экономикалық одақ Моңғолиямен уақытша сауда келісімін жасады. Келісім әрбір тарап үшін құжат күшіне енген сәттен бастап кедендік баждар нөлденетін немесе төмендетілетін 367 тауар субпозициясын қамтиды. Бұл туралы Еуразиялық экономикалық комиссия хабарлады.

ЕЭК ақпараты бойынша, Келісім оның қолданысын тағы бір үш жылдық кезеңге ұзарту мүмкіндігімен үш жылға жасалды.

«Статистикаға сәйкес, тарифтік преференциялармен ЕАЭО-ның Моңғолияға 2 млрд долларға экспорттық жеткізілімдері, яғни 90%-дан астамы қамтылатын болады. Келісілген преференциялар ЕАЭО компанияларына жыл сайын 100 млн долларға дейін үнемдеуге мүмкіндік береді», – деп атап өтті Еуразиялық экономикалық комиссияның сауда министрі Андрей Слепнев.

Сауда келісіміне сәйкес ЕАЭО елдерінің аграрийлері Моңғолия нарығына бидай, жүгері, сүт өнімдері, өсімдік майлары, ет және құс өнімдері, қант, кондитерлік өнімдер, ірімшіктер, минералды су және алкоголь өнімдері сияқты қағидатты маңызды тауарларды жеткізу үшін преференциялық жағдайларға ие болады. Сондай-ақ, келісім шарттары бірқатар өнеркәсіптік тауарларға қолданылады.

Өз кезегінде моңғолиялық тауарларға ет (жылқы еті, ІҚМ еті, қой еті, ет консервілері, қосалқы өнімдер), сүт өнімдері (йогурттар, ірімшік), жеңіл өнеркәсіп тауарлары (жүн, жіп), сондай-ақ трикотаж және тоқыма киімдерін қоса алғанда, дайын сапалы жеңіл өнеркәсіп бұйымдары бойынша артықшылықты қолжетімділік беріледі.

Одан әрі кооперация үшін мүмкіндіктер келісімнің тарифтік емес бөлігінде: техникалық реттеу, санитарлық, ветеринарлық және фитосанитарлық шаралар, кедендік ынтымақтастық, электрондық сауда және экономикалық ынтымақтастық саласында қарастырылған.

«Соңғы бірнеше жылда ЕАЭО мен Моңғолия арасындағы тауар айналымы бір жарым еседен астам өсті. Келісімнің жұмыс істеуінің басталуымен мұндай үрдіс жалғасады және нығаяды деп күтеміз, бұл біздің тауар айналымымызды 3 млрд долларға дейін жеткізуге мүмкіндік береді», – деді Андрей Слепнев.