"Елім-ай" ШҚ Өзбекстанға 700 бас ІҚМ экспорттады

"Елім-ай" шаруа қожалығының Bordaky mal бордақылау алаңы Өзбекстанға 700 бас ірі қара жіберді. Олар ет өнімдерін өндіру үшін Ташкент облысына жеткізіледі. Бұл туралы Абай облысының әкімдігінде хабарлады.

"2019 жылы біз Өзбекстанмен келісімшартқа отырдық. Бүгін біз алғаш рет салмағы 600-700 кг болатын ангус, симментал, герефорд сияқты асыл тұқымды бұқаларды экспортқа жібердік. Алдағы жылы мал басын көбейтіп, Араб елдеріне, Иран мен Қытайға экспортқа шығуды жоспарлап отырмыз", - деді "Елім-ай" шаруа қожалығының директоры Болат Бекбердинов.

"Елім-ай" шаруа қожалығы - Қазақстандағы ең ірі шаруалардың бірі. Мал шаруашылығымен қатар ШҚ дәнді және майлы дақылдарды өсіре отырып, егіншілікті табысты дамытуда.

Тақырып бойынша оқу: Сүт саласы Қазақстанның барлық АӨК-нің драйвері бола алады

Естеріңізге сала кетейік, Қазақстанда 2022 жылғы 31 желтоқсаннан бастап 2023 жылғы 1 наурызға дейін тірі малды әкетуге квоталар қолданылады: 60 мың бұқа және 120 мың қой. Ауыл шаруашылығы министрлігінің деректері бойынша 6 ақпанда 13 033 бас карантинге қойылды, оның ішінде 10,6 мың ІҚМ және 2,4 мың ұсақ мал.