Қазақстанның бес облысында 54 мың құс қырылды
Бүгінгі күнге дейін құстардың өлімі Қазақстанның бес облысында тіркелген. Қазір құс тұмауының таралуын растайтын зертханалық талдаулар жүргізілуде. Бұл туралы бүгін Ауыл шаруашылығы вице-министрі Гүлмира Исаева брифингте мәлімдеді.
«Бүгінгі күні құстардың өлімі Қазақстан Республикасының бес облысының 26 ауданындағы 47 елді мекенде тіркелді. Жеке фермаларда құс өлімінің жалпы саны 12 926 басты құрады. Сондай-ақ, Солтүстік Қазақстан облысының Бішкүл құс фабрикасында 41 мың үй құсының жаппай қырылу оқиғасы тіркелді», - деп хабарлады вице-министр.
Құс тұмауының ең көп таралуы қазіргі уақытта Солтүстік Қазақстан облысында тіркелуде, онда 11 облыстың 27 елді мекені зардап шекті. Зертханалық жұмыстар 23 елді мекендегі құс тұмауын растады.
Сонымен қатар, Ақмола облысында құстардың қырылуы 5 ауданның 9 ауылында болды, онда 286 құс өлді.
Қостанай облысының 6 ауданындағы 6 елді мекенде 505 бас құс өлді, Павлодвр облысында 1463 бас өлім тіркелді.
Сондай-ақ, Қарағанды облысы Нұра ауданының бір ауылдық округінде өлім фактісі бойынша зертханалық зерттеулер жүргізіліп жатыр, онда фермаларда 43 құс өлді.
Гүлмира Исаева хабарлағандай, 4 тамыздан бастап Ветеринариялық бақылау және қадағалау комитеті құс тұмауына байланысты Ресейдің шекаралас аймақтарынан құс өнімдерін және тірі құстарды әкелуге шектеулер енгізді. Жағдайды жедел штаб облыстық әкімдіктермен бірге бақылайды.
«Эпизоотиялық зерттеу аурудың таралуы қазіргі уақытта солтүстіктен оңтүстікке қоныс аударып жатқан жабайы құстардың өлімінен басталғанын көрсетті. Инфекция ортақ су арналарын пайдалану арқылы пайда болды. Зертханалық зерттеулер жүргізіліп, жоғары патогенді құс тұмауы анықталып, соңғы диагноз қойылғаннан кейін, барлық қажетті шаралар қабылданды. Республикалық қордан 1,4 миллион дозадан вакцина бөлінді, бұл 4,7 миллион малды вакцинациялауға мүмкіндік береді. Ертең 1 млн доза вакцина жеткізіледі, бұл 3,5 млн бас құсқа вакцинация жасауға мүмкіндік береді», - деді вице-министр.
Оның айтуынша, осы жылдың басынан бастап Ветеринариялық бақылау және қадағалау комитеті аймақтарға құс тұмауына қарсы 3,4 миллион доза вакцинасын жіберген, бұл жеке шаруа қожалықтарында 11,8 миллион құсқа вакцина егуге мүмкіндік берді. Статистикалық мәліметтерге сәйкес, бүгінде Қазақстан Республикасында жеке қосалқы шаруашылықтарда 46,7 млн құс бар.
Карантин жарияланған жерлерде эпизоотияға қарсы республикалық отряд жұмыс істей бастады. Өлген құстардың денелерін жою және осы құс ұсталған үй-жайларды дезинфекциялау бойынша жұмыстар жүргізілуде. Ауыл шаруашылығы министрлігі аурудың басқа аймақтарға таралуын болдырмау мақсатында шаралар тез арада жүзеге асырылады деп сендірді.
Сондай-ақ, эпизоотияға қарсы республикалық отряд өлген құс үшін өтемақы төлемдерін жасайтын болады.