Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
Қазақстанда мал шаруашылығына жеңілдетілген несиелеу басталды
20 марта 2026 10:00
«Аграрлық несие корпорациясы» АҚ (АНК) – «Бәйтерек» ұлттық инвестициялық холдингінің еншілес ұйымы – 2026–2030 жылдарға арналған Қазақстан Республикасында мал шаруашылығын дамыту жөніндегі кешенді жоспар аясында қабылданған «Агробизнес мал шаруашылығы» жаңа бағдарламасының іске қосылғанын хабарлайды.
Бұл бастама Қазақстан Республикасының президенті Қасым-Жомарт Тоқаевтың тікелей тапсырмасы бойынша азық-түлік қауіпсіздігін қамтамасыз ету және асыл тұқымды мал қорын сапалы жаңарту мәселелерін жүйелі түрде шешу мақсатында қолға алынды.
Қазақстандағы мал шаруашылығының әлеуеті өте жоғары әрі әлі толық ашылмаған. Сондықтан бұл сала ұлттық экономиканың қуатты қозғаушы күшіне айнала алады. Қазіргі таңда ол елдегі ауыл шаруашылығының жалпы өнімінің шамамен 40%-ын құрайды.
Отандық мал шаруашылығының берік негізін қалыптастыру және саланың тұрақты дамуын қамтамасыз ету мақсатында бағдарлама негізінен асыл тұқымды мал өсірумен айналысатын шаруашылықтарды қолдауға бағытталады.
Фермерлерге мемлекеттік қолдау шараларының қолжетімділігін арттыру үшін Қазақстан Республикасы Ауыл шаруашылығы министрлігі несие берудің барынша қолайлы шарттарын белгіледі:
- жылдық 6% мөлшерінде бекітілген жеңілдетілген сыйақы мөлшерлемесі;
- мал шаруашылығы бағыттарының ерекшеліктерін ескеретін икемді несие мерзімдері, бұл фермерлерге инвестициялық цикл мен мал басын көбейтуді тиімді жоспарлауға мүмкіндік береді;
- мақсатты бағыты – асыл тұқымды мал сатып алу.
Қаржыландыру АНК филиалдары арқылы тікелей несие беру жолымен, сондай-ақ кредиттік серіктестіктер (КС) мен екінші деңгейлі банктер (ЕДБ) арқылы жүзеге асырылады.
«Агробизнес мал шаруашылығы» бағдарламасының іске қосылуы – бұған дейін басталған аграршыларды жүйелі қолдаудың жалғасы. Атап айтқанда, «Кең дала» бағдарламасы (көктемгі егіс және егін жинау жұмыстарын қаржыландыру), сондай-ақ отандық өңдеуші кәсіпорындарды қаржыландыру бағдарламаларымен сабақтасып, қазақстандық мал өсірушілерді қолжетімді қаржымен қамтамасыз етуге бағытталған.
Қосымша ақпаратты 1408 бірыңғай call-орталығы арқылы және «Аграрлық несие корпорациясы» АҚ-ның agrocredit.kz сайтынан алуға болады.
