Қазақстан Кувейтке ет экспорттауды жоспарлап отыр

Фото көзі: МИД РК

Кувейттік азық-түлік дистрибуторы - Al Deira компаниясы - Қазақстаннан ет өнімдерін, оның ішінде сиыр мен қой етін импорттауға мүдделі. Ол үшін компания өкілдері жетекші қазақстандық өндірушілермен және жеткізушілермен ынтымақтастық орнатуды жоспарлап отыр. Бұл туралы ҚР СІМ баспасөз қызметі хабарлады.

Қазақстанның Кувейттегі елшісі Ержан Елекеев Al Deira өкілдері мен шейх Ухуд Салем Аль-Али Ас-Сабахпен кездесті.

«Кездесу қорытындысы бойынша 2026 жылдың жазында Кувейт тарапы өкілдерінің ынтымақтастықтың мүмкіндіктерін егжей-тегжейлі зерделеу, кәсіпорындармен кездесулер өткізу және қазақстандық ет өнімдерін импорттау келешектерін талқылау үшін Қазақстанға сапарын ұйымдастыру туралы уағдаластыққа қол жеткізілді», - деп СІМ хабарлады.

Ержан Елекеев атап өткендей, Қазақстанның Кувейттің ғана емес, жалпы өңірдің де азық-түлік қауіпсіздігін қамтамасыз етуге көмектесетін айтарлықтай әлеуеті бар. Оның ішінде, Қазақстан әлемнің 80-нен астам еліне ауыл шаруашылығы өнімдерін жеткізуді жүзеге асыра отырып, астықты әлемдік ірі экспорттаушылардың бірі болып табылады. Сондай-ақ, ел күнбағыс майының әлемдік үздік-10 экспорттаушысына алғаш рет кіре отырып, май-тоңмай өнімдерінің халықаралық нарығындағы орнын дәйекті түрде нығайтуда.

Кездесу соңында тараптар сауданы одан әрі кеңейтуге және Қазақстан мен Кувейттің іскер топтары арасындағы тікелей байланыстарды дамытуға өзара мүдделілігін растады.

Al Deira компаниясы HoReCa секторының сауда желілеріне, мейрамханаларына, қонақ үйлеріне және басқа да объектілеріне жеткізуді қамтамасыз ете отырып, Кувейт Мемлекетінің нарығында азық-түлік өнімдерін дистрибуциялау саласындағы қызметті жүзеге асырады. Компания азық-түлік дистрибуциясы нарығының көрнекті ойыншыларының бірі болып табылады және қазіргі уақытта Қазақстаннан ет өнімдерінің импортын кеңейту мүмкіндіктерін зерттеп жатыр.