Қазақстан 50 мың бас малды импорттауды жоспарлап отыр

Фото көзі: Минсельхоз РК

Қазақстанға 50 мың бас асыл тұқымды мал, оның ішінде 40 мың бас ірі қара және 10 мың бас ұсақ мал әкелу жоспарланып отыр. Бүгінгі таңда елге 9,5 мыңға жуық ірі қара импортталған. Мал импорты 2026–2030 жылдарға арналған мал шаруашылығын дамыту жөніндегі кешенді жоспар аясында жүзеге асырылуда. Бұл туралы Ауыл шаруашылығы министрлігінің баспасөз қызметі хабарлады.

16 қазанда Австралиядан ангус тұқымды ірі қараның ірі партиясы арнайы әуе рейсімен жеткізілді. Бортында 305 бас ірі қара болған жүк ұшағы Астана әуежайына қонды. Кейін мал Солтүстік Қазақстан облысындағы «Шал ақын АГРО-2020» және Asyl Farms шаруашылықтарына жеткізілді.

«Етті бағытты дамыту — біздің шаруашылық үшін ең алдымен өндірісті әртараптандыруға және өзіміздің жемшөп қорын тиімді пайдалануға мүмкіндік береді. Бордақылау көрсеткіштері жақсы әрі етінің сапасы жоғары болғандықтан, абердин-ангус тұқымын таңдадық. Австралиядан асыл тұқымды мал әкелу жоғары өнімді табын қалыптастыруға және алдағы уақытта тікелей Солтүстік Қазақстан облысында асыл тұқымды мал өсіруді дамытуға мүмкіндік береді», — деді «Asyl Farms» ЖШС директоры Ғабиден Балғынбеков.

Ауыл шаруашылығы министрлігінің мәліметінше, Солтүстік Қазақстан облысы асыл тұқымды мал шаруашылығын дамыту орталықтарының біріне айналып келеді. Өңірде жалпы құны 15 млрд теңге болатын асыл тұқымды мал сатып алуға бағытталған 23 жобадан тұратын пул қалыптастырылған. Жыл басынан бері облысқа Германия мен Даниядан 3 мыңнан астам бас аналық мал әкелінді. Жыл соңына дейін Австралиядан асыл тұқымды мал жеткізетін тағы 10 әуе рейсі күтілуде. Болжам бойынша, өңірге импортталған малдың жалпы саны 11 мыңға жуық ірі қара мен 1,5 мыңнан астам ұсақ малға жетеді.

Сонымен қатар өңірде инфрақұрылым да дамып келеді. Қазіргі уақытта Солтүстік Қазақстан облысында 118 тауарлы-сүт фермасы жұмыс істейді, оның 50-і — заманауи ферма. Бұдан бөлек, жалпы қаржыландыру көлемі 1,5 млрд теңгені құрайтын 57 ветеринариялық пункттің құрылысы жүргізілуде.