Қазақстанда алты ет кластері мен мал биржасы салынып жатыр

Фото көзі: ElDala.kz

Қазақстанда ет өндірісін арттыру мақсатында толық өндірістік циклі бар алты ет кластерін іске қосу және Түркістан облысында алғашқы мамандандырылған мал биржасын салу жұмыстары жүргізіліп жатыр. Бұл туралы үкімет отырысында ауыл шаруашылығы министрі Айдарбек Сапаров мәлімдеді.

Министрдің айтуынша, аталған кластерлерде 130 мың бас мал бордақыланып, 26 мың тонна ет өндіру жоспарланып отыр.

• «Қайып Ата» ЖШС (Түркістан облысы) – 70 мың басқа арналған бордақылау алаңы, 1396 гектар суармалы жер, құрама жем зауыты және мал биржасы;
• «Евразия Агро Семей» ЖШС (Абай облысы) – 5 мың басқа арналған бордақылау алаңы және жылына 14 мың тонна дайын өнім өндіретін ет комбинаты;
• «Терра» ЖШС (Қостанай облысы) – 25 мың басқа арналған бордақылау алаңы, 853 гектар суармалы жер және 7 мың тонналық ет комбинаты;
• «Жер-Су» ЖШС (Жетісу облысы) – 5 мың басқа арналған бордақылау алаңы, 880 гектар суармалы жер, құрама жем зауыты және 3500 тонналық ет комбинаты;
• «Терра Ақжайық» ЖШС (Батыс Қазақстан облысы) – 15 мың басқа арналған бордақылау алаңы және 1200 гектар суармалы жер;
• «Алтын Фарм» ЖШС (Ақмола облысы) – 10 мың басқа арналған бордақылау алаңы, 1800 гектар суармалы жер және 2500 басқа арналған асыл тұқымды мал өсіру кешені.

Сонымен қатар Солтүстік Қазақстан облысының тәжірибесін еліміздің басқа өңірлеріне тарату аясында тауарлы-сүт фермаларын салу жұмыстары жалғасып жатыр. Қазірдің өзінде жылына 462 мың тонна сүт өндіруге қауқарлы 71 ферма салынды. Ағымдағы жылдың соңына дейін олардың жобалық қуатының 70%-ына, ал келесі жылы 100%-ына қол жеткізу жоспарланып отыр.

Жалпы, бағдарлама аясында жылына 600 мың тоннадан астам сүт өндіретін 99 жоба қаржыландырылды. Қазір жылына 142 мың тонна сүт өндіретін 28 тауарлы-сүт фермасының құрылысы жүзеге асырылып жатыр.

«Келесі жылға жалпы қуаты 228 мың тонна болатын 21 тауарлы-сүт фермасынан тұратын тізім қалыптастырылды», – деді Айдарбек Сапаров.

Бұдан бөлек, Ауыл шаруашылығы министрлігінің басшысы мемлекет басшысының отандық ауыл шаруашылығы өнімдерін өткізу нарықтарын кеңейту жөніндегі тапсырмасына сәйкес Сауда және интеграция министрлігі агрологиялық орталықтар желісін құру жұмыстарын жүргізіп жатқанын хабарлады.

«Шағын өндірушілерді саудаға тарту мақсатында олардың өнімдерін маркетплейстер арқылы өткізу жобасы жүзеге асырылып жатыр. Бұл жұмысқа отандық компаниялар, соның ішінде «Қазақтелеком» АҚ да тартылуда», – деп түйіндеді министр.