Ауыл шаруашылығы министрлігі мал азығының бағасына бақылау жасауды күшейтеді

Ауыл шаруашылығы министрлігі жанындағы Азық-түлікпен қамтамасыз ету жөніндегі республикалық жедел штабтың отырысында жемшөп пен кебек бағасының негізсіз өсуіне қатысты жағдай талқыланды. Ауыл шаруашылығы министрінің міндетін атқарушы Ербол Қарашукеев мәлімдегендей, қолданыстағы заңнама аясында бағаның өсуін жедел түрде бақылау қажет. Бұл туралы Ауыл шаруашылығы министрлігінің баспасөз қызметінен хабарлады.

«Жем-шөп пен кебек сататындарға түсіндіру жұмыстарын жүргізудің маңыздылығын ерекше атап өткім келеді. Сондай-ақ, бұл істе делдалдардың болмауын бақылау қажет», - деді Ербол Қарашүкеев.

Ауыл шаруашылығы министрлігі жекелеген сарапшылар мен талдаушылар күрделі жағдайды пайдалана отырып, іс жүзінде пайда келтіру мақсатында ақпараттық соғыс жүргізіп жатқанын мәлімдеді. Ал әкімдіктерден толық шынайы ақпарат болмаған жағдайда жұртшылық жаңылысады. Дүрбелең салдарынан фермерлер зардап шегеді, онсыз да арзан емес азық осындай PR-акциялардан кейін үнемі қымбаттауда.

«Соңғы рет 3 млн мал қырылғандығы туралы хабарланғаннан соң, шөп пен кебектің бағасы тағы да өсті! Осы мәселеде өңір басшыларынан жемшөп дайындау барысы жайлы, жергілікті атқарушы органдардың қабылдайтын шаралары туралы барлық жаңалықтардың жұртшылық үшін барынша ашық болуларын сұраймын», - деп атап өтті министрдің міндетін атқарушы.

 Тақырыпқа байланысты оқу: ҚР-да мал азығын дайындайтын техниканы сатып алуға қосымша қаржы бөлінеді

АШМ Мал шаруашылығы өнімдерін өндіру және қайта өңдеу департаментінің мәліметінше, бүгінгі таңда ҚР-да 17,6 млн тонна шөп дайындалды, бұл жоспардың 74% -ын құрайды. Шөпті дайындау мөлшерінің ең төменгі көрсеткіштері Маңғыстау облысында - 40%, Шығыс Қазақстан облысында - 50%, Қызылорда облысында - 54% және Атырау облысында - 57%.

Құрғақшылықтан зардап шеккен облыстарға үкіметтің резервінен мал азығын арзандату үшін 3,6 млрд теңге бөлінсе, Маңғыстау облысында жемшөп дайындау үшін республикалық бюджеттен 5,3 млрд теңге пайдалануға рұқсат берілді. Сондай-ақ Азық-түлік корпорациясы 1,7 мың тонна арпаны нарықтық бағамен 17% -ға төмен бағамен өткізді. «ҚТЖ» АҚ тамыз айының соңына дейін азық тасымалының теміржол тарифтерін нарықтағы бағадан 77% төмен деңгейде ұстап тұрады. Жем-шөп дайындау үшін табиғи қорықтар мен жайылымдардың 211 мың га жерін пайдалануға рұқсат етілген. Өңірлер бойынша 43,2 мың тонна жеңілдетілген бағамен дизель отыны қосымша бөлінді.

«Мал азығын дайындауға жергілікті бюджеттерден 9,1 млрд теңге бөлінді, облыстық мәслихаттардың қарауында қосымша 4,5 млрд теңге бөлу мәселесі тұр. Өңірлер арасында ынтымақтастық туралы меморандумдарға қол қойылды, соның аясында азық қорларын толықтыру жұмыстары жүргізілуде», - деп атап өтті Ербол Қарашүкеев.

Ведомство басшысы жемшөп дайындау қарқынының төмендеуіне жол бермеуге шақырды. Бірқатар өңірлерде 100 пайыздық межеге жақындады, азық дайындауды жалғастырып, екі жылдық резерв құру қажет. Жеке қосалқы шаруашылықтарға ерекше назар аударылуы тиіс, әкімдіктерде олардың қажеттілігі мен жемшөп тапшылығы бар шаруашылықтардың тізімі болуы тиіс.

Тақырыпқа байланысты оқу: ҚР аймақтарына егістіктерден шөп жинау тапсырылды

Министрдің міндетін атқарушы астық өсіруші шаруашылықтар үкіметтің сабанды ұсақтамай дайындау және қоймаға жинау туралы тапсырмасын толық көлемде орындауға тиіс екенін ерекше атап өтті. Мұнда негізінен арпа мен қара бидай сабанын жинау қажет болып тұр.