Қытай Қазақстанда жүгеріні қайта өңдеуге 150 млн доллар инвестиция салады

Фото көзі: ElDala.kz

Өткен маусымда Қазақстанның оңтүстігіндегі аграрийлер жүгері дақылының едәуір бөлігін уақтылы өткізе алмады, ал биыл бұл дақылдың егіні айтарлықтай қысқарды. Егер 2023 жылы астыққа егілген жүгері алқабы 193,8 мың гектарды құраса, ағымдағы жылы жоспар бойынша 174 мың гектарға 171,6 мың ғана егілді. Сонымен бірге болашақта қытайлық инвесторлардың қатысуымен елде шикізатты сатып алудың үлкен көлемін қамтамасыз ететін жүгеріні терең өңдеу бойынша жаңа өндірісті іске қосу жоспарлануда.

Жобаны іске асыру туралы Мәжіліс депутаттарының сұрауына жауап бере отырып, вице-премьер Серік Жұманғарин хабарлады. Ол жүгеріні астыққа өсірудің негізгі өңірлері Жетісу, Алматы және Түркістан облыстары болып табылатынын атап өтті. Өткен жылы онда орташа өнімділігі гектардан 63,3 ц болғанда 1 млн 189,1 мың тонна жүгері дәні бастырылды (2022 жылы өнімділігі гектардан 58 ц құрады). Қазір елімізде жұмыс істеп жатқан жүгеріні терең өңдейтін екі зауыт жылына 210 мың тонна өңдей алады: Жетісу облысындағы Жаркент крахмал-сірне зауыты және Алматы облысындағы «АзияАгроФуд».

Өңдеу үшін жүгері шикізатының жеткілікті көлемінің болуын ескере отырып, Ауыл шаруашылығы министрлігі Kazakh Invest-пен бірлесіп ауыл шаруашылығы дақылдарын, оның ішінде «Қорғас» АЭА аумағында терең өңдеу бойынша жаңа өндірістер құруға инвесторларды тарту бойынша жұмыс жүргізуде.

«2024 жылғы 2 сәуірде қытайлық Zhejiang Sunny Group Co., Ltd. компаниясымен кездесу өткізілді, оның барысында қытай тарапы Қазақстан аумағында жүгеріні терең өңдеу жөніндегі жобаны іске асыруға қызығушылық білдірді. Құрылыстың жалпы мерзімі 10 жылды құрайды, жобаға инвестиция көлемі - 150 млн доллар, 500-ге жуық жаңа жұмыс орны құрылады. Қазіргі уақытта аталған жобаны іске асыру үшін жүгеріні пилоттық отырғызу үшін тұқым әкелу мәселесі пысықталуда», - деді вице-премьер.