Қазақстанда 1,8 млн тонна астық бастырылды

Фото көзі: ElDala.kz

Биыл Қазақстанда дәнді дақылдар алқабы 16,7 млн га құрайды. Оның 928,2 мың га жиналды. Орташа өнімділігі гектардан 19,3 ц болғанда 1,8 млн тонна астық бастырылды. Жаппай егін жинау жұмыстарының басталуы тамыздың үшінші онкүндігіне жоспарланған, деп хабарлады ҚР премьер-министрінің баспасөз қызметі.

Үкімет басшысы Олжас Бектенов вице-премьер Серік Жұманғариннің басшылығымен бейінді министрліктер, әкімдіктер мен аграрийлер арасында үйлестіру және бақылау үшін егін жинау науқанын өткізу жөніндегі жедел штаб құруды тапсырды.

Жұмыстарды жүргізуге аграрийлерге 64 мың тоннадан астам жеңілдікті дизель отыны жөнелтілді. Бекітілген кестеге сәйкес, өңірлерге нарықтық бағадан төмен деңгейде тіркелген баға бойынша шамамен 355 мың тонна жеткізілетін болады. Олжас Бектенов отынмен мәселені тұрақты бақылауда ұстау міндетін қойды, қажеттілік туындаған жағдайда – аграрийлерге астықты кептіруге дизель отынының қосымша көлемін бөлу міндетін қойды.

Сондай-ақ, премьер-министр 10 қыркүйекке дейін элеваторларды өткен жылғы егін қалдықтарынан босатуды тапсырды. Облыс әкімдіктері Бәсекелестікті қорғау және дамыту агенттігімен бірлесіп элеваторлардың қызметтері бағасының негізсіз өсуіне жол бермеуге тиіс.

Өндірілген АӨК өнімдерін, оның ішінде басым экспорттық нарықтарда өткізуді қамтамасыз етудің маңыздылығы атап өтілді. Сауда және интеграция министрлігі осы бағытта Қытайдан, Таяу Шығыстан, Африкадан және басқа елдерден келген серіктестермен жұмысты жандандыруы қажет.

«Сапалы егін жинау және сақтау ел үшін ерекше маңызға ие. Күнделікті режимде туындайтын барлық мәселелерді пысықтау қажет. Бұл тек министрліктерге ғана емес, әкімдіктер мен фермерлердің өздеріне де қатысты. Ауыл шаруашылығы министрлігіне облыс әкімдіктерімен бірлесіп, егін жинау жұмыстарының барысын ерекше бақылауда ұстауды тапсырамын. Дәнді дақылдарды сақтаудың тиісті жағдайларын қамтамасыз ету маңызды», — деп атап өтті Олжас Бектенов.