Азық-түлік корпорациясы 2,8 млрд теңге көлік субсидиясын төледі

Фото көзі: ElDala

Азық-түлік корпорациясы бидайды алыс шетел нарықтарына жеткізетін ауыл шаруашылығы өндірушілері мен астық экспорттаушыларына 2,8 млрд теңге төледі. 10 маусымдағы жағдай бойынша көлік шығындарын өтеуге 345 өтінім түсті. Бұл туралы Азық-түлік корпорациясының баспасөз қызметі хабарлады.

"Экспорттық жеткізілімдердің жалпы көлемі 16,8 млрд теңгеге 740,7 мың тонна бидайды құрады. Экспорттың негізгі бағыттары Әзірбайжан – 329,3 мың тонна, Балтық елдері – 224,5 мың тонна, Грузия – 41 мың тонна және Қара және Балтық теңіздерінің порттары арқылы транзиттік бағыттар – 108,3 мың тонна болды", - деп атап өтті баспасөз қызметінде.

Азық-түлік корпорациясы экспорттаушыларға 121,7 мың тонна бидай жеткізгені үшін 2,8 млрд теңгеден астам төлегені хабарланды. Атап айтқанда, жеткізушілерге Әзірбайжанға астық жөнелтуге 1,1 млрд теңге, Балтық елдеріне – 1,2 млрд теңге, Ауғанстанға – 223,2 млн теңге, Грузияға – 21 млн теңге, Қара теңіз бағытында – 170,2 млн теңге көлемінде қаражат аударылды. Төлемдер жеткізу көлемі расталуына және субсидиялау шарттарының сәйкестігіне қарай кезең-кезеңмен жүргізіледі.

Естеріңізге сала кетейік, Азов, Қара және Балтық теңіздерінің порттарына, Латвия, Литва, Эстонияға транзиттік бағыттар бойынша бидайды тасымалдағаны үшін ішінара өтемақы беріледі. Сондай-ақ, астықты Қытай арқылы Оңтүстік-Шығыс Азия елдері бағытында транзитпен жөнелтетін жеткізушілер үшін мемлекеттік қолдау көзделген.

Өтемақы мөлшері экспорт бағытына байланысты бір тонна астық үшін 20-дан 30 мың теңгеге дейін құрайды.

Субсидияларды төлеу қағидалары 2025 жылғы 1 қаңтардан бастап жасалған тасымалдарға қолданылады.

"Ағымдағы нарықтық жағдайды ескере отырып, Азық-түлік корпорациясы экспорт географиясын кеңейтуге, оның ішінде Балтық порттары арқылы жаңа халықаралық сауда алаңдарына шығуға және жоғалған нарықтардағы орнын қалпына келтіруге ерекше назар аударады", - деп атап өтті баспасөз қызметінде.