Қазақстан алдағы бес жылда сүт өнімдерімен толық қамтамасыз етіледі-АШМ

Ауыл шаруашылығы министрлігі бес жыл ішінде  сүт өнімдерінің импортқа тәуелділігін жоюды жоспарлап отыр. Бұл туралы ведомствоның баспасөз қызметінен хабарлады.

Ауыл шаруашылығы министрлігінде атап өткендей, импортты алмастыру мақсатында аймақта сүт фермаларының желісін құру және кеңейту бойынша жобалар іске асырылуда.

«2019 жылы қуаттылығы 40 мың тонна сүт өндіретін 8 өнеркәсіптік және 14 отбасылық ферма іске қосылды (өткен жылдары тек 3 сүт фермасы іске қосылған). Алайда, әзірге сүт өнімдерінің импорты жылына 464 мың тонна көлемінде болып отыр. Сондықтан қысқа мерзімді және орта мерзімді жоспар бойынша жыл сайын 25 өнеркәсіптік сүт фермасын пайдалануға беру міндеті тұр», - деп атап өтті баспасөз қызметі.

Осылайша, ведомствоның мәліметінше, қабылданып жатқан шаралар есебінен өңделген сүтті 5 жыл ішінде 500 мың тоннаға ұлғайту арқылы импортты алмастыру мәселесін толығымен шешу көзделіп отыр.

 Сондай-ақ, 2020 жылдың бірінші жарты жылдығында Қазақстанда жалпы 3810 бас ірі қара малы бар 6 ірі сүт фермасы пайдалануға берілді, жыл соңына дейін тағы 16 сүт фермасын іске қосу жоспарлануда. Статистика комитетінің деректеріне сәйкес, Қазақстанда 2020 жылғы қаңтар – наурыз айында қойылтылмаған сүт пен кілегейдің экспортының құны $2 897,8 мың болып, 5 985,9 тоннаны құрады, импорт - $4 236 мың ақша болып, 5 255 тонна болды. Ал сүт және қант қосылған қойылтылған кілегей 274,9 тонна ($1 120 мың) экспортталды, 11 524 тонна ($25 176,3 мың) импортталды.

Сүт өнімдерінің экспорты бойынша жағдай мынадай: үш ай ішінде Қазақстан 115,6 тонна ($600,6 мың) көлемінде сүттен жасалған сары май мен өзге де майларды экспорттады, ал 1 587,2 тонна ($6 370,1 мың) импортталды. Ірімшік пен сүзбе экспорты 450,6 тонна  ($1 501,7 мың) болды, импорт - 7326,1 тоннаны ($23 159,4 мың) құрады.

Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.