Ауыл шаруашылығы министрлігі сиыр етінің экспортына квота көлемін белгіледі

Фото көзі: ElDala.kz

Ауыл шаруашылығы министрлігінің 2025 жылғы 29 желтоқсандағы №503 бұйрығымен сиыр етін әкетуге шектеу жарты жылға ұзартылды. Квоталар 20 мың тонна көлемінде белгіленген.

«Алты ай мерзімге Қазақстан Республикасының аумағынан ірі қара малдың етін үшінші елдерге және Еуразиялық экономикалық одақ елдеріне әкетуге 20 мың тонна көлемінде сандық шектеулер (квоталар) енгізілсін», - делінген АШМ бұйрығында.

Сондай-ақ, құжат сандық шектеулерді бөлу Ережелерін бекітті.

Ірі қара малдың етін әкетуге арналған квота мөлшері 20 мың тоннаны құрайды.

Бір компанияға квота мөлшері бордақылау алаңының қуатына байланысты белгіленеді:

• бордақылау алаңының қуаттылығы 5 мың бастан – 1 мың тонна;
• бордақылау алаңының қуаттылығы 10 мың бастан – 2 мың тонна;
• бордақылау алаңының қуаттылығы 15 мың бастан – 3 мың тонна;
• бордақылау алаңының қуаттылығы 20 мың бастан – 4 мың тонна;
• бордақылау алаңының қуаттылығы 50 мың бастан – 10 мың тонна.

Естеріңізге сала кетейік, Қазақстанда 3-31 желтоқсан аралығында 13 мың тонна көлемінде сиыр етін әкетуге квота қолданылады. 18 желтоқсанда ВАК отырысында шектеуді ұзарту туралы шешім қабылданды. Ауыл шаруашылығы министрлігі квота «елдің азық-түлік қауіпсіздігін қамтамасыз ету, мал шаруашылығы өнімдерін қайта өңдеуді дамыту, сондай-ақ сиыр етінің бағасын тұрақтандыру мақсатында» енгізіліп жатқанын мәлімдейді.

Бұған дейін үкімет сиыр етін әкетуге квота өңдеу кәсіпорындарына берілетінін, бұл ретте ет нарығындағы өнімсіз делдалдар экспорт тізбегінен шығарылатынын түсіндірді.

Қазақстанның Ауыл шаруашылығы министрлігінің мәліметінше, 11 айда елімізде барлық түрдегі 1 млн 021,6 мың тонна ет өндірілді, бұл 2024 жылғы көрсеткіштен 3%-ға артық.  Оның ішінде 358,8 мың тонна сиыр еті (2024 жылы – 351,4 мың тонна), 111,8 мың тонна қой еті (109,1 мың тонна), 146,8 мың тонна жылқы еті (140 мың тонна), 337,1 мың тонна құс еті (326,3 мың тонна) өндірілді.

Ірі қара мал саны 2,7%-ға артып, 8,3 млн басқа жетті.