Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
Қазақстанда Ветеринариялық палата құрылады
08:05
Құрылтайда депутаттардың бастамасымен әзірленген ветеринария мәселелері бойынша ҚР кейбір заңнамалық актілеріне өзгерістер мен толықтырулар енгізу туралы заң жобасы таныстырылды. Бұл туралы Құрылтайдың баспасөз қызметі хабарлады.
«Заң жобасы ветеринариялық жүйені жетілдіруге, ветеринариялық бақылауды күшейтуге және сала мамандарының кәсіби бірлестігі ретінде ветеринариялық палатаны құруға бағытталған бірқатар өзгерісті көздейді. Ветеринария саласындағы мамандарды әлеуметтік қолдау шараларын кеңейтуге ерекше назар аударылады. Бұл кадрлық әлеуетті нығайтып, салаға жас мамандарды тартуға мүмкіндік береді», – деді депутат Серік Егізбаев.
Депутат Рабиға Тоқсейітованың айтуынша, өзгерістер ветеринариялық қызметтің тиімділігін арттыруға және саланы басқару жүйесін жетілдіруге бағытталған.
«Заң жобасында ветеринария саласындағы мемлекеттік басқару деңгейлері арасында өкілеттіктерді ажырату, сондай-ақ жергілікті атқарушы органдар құрған ветеринариялық ұйымдарды өздеріне тән емес функциялардан босату көзделген. Сонымен қатар мамандардың құқықтары мен заңды мүдделерін қорғау, оларды есепке алу және біліктілігін арттыру мақсатында ветеринариялық палата түрінде мәртебесі заңмен айқындалған орган құру ұсынылады. Маңызды бағыттардың бірі – ветеринариялық препараттардың айналымына қатысты рәсімдерді Еуразиялық экономикалық одақтың талаптарына сәйкестендіру. Бұдан бөлек, ветеринария саласындағы мамандардың мәртебесін арттыру, әлеуметтік қолдау шараларын кеңейту және оларды арнайы жұмыс киімімен қамтамасыз ету қарастырылған», – деді Рабиға Тоқсейітова.
Сондай-ақ заң жобасы аясында эпизоотиялық ошақтарды тексеру және бірқатар бақылау функцияларын Ветеринариялық бақылау және қадағалау комитетінің құзыретіне беру ұсынылады.
Ветеринария саласының мамандарына жыл сайынғы еңбек демалысы кезінде екі лауазымдық жалақы мөлшерінде сауықтыру жәрдемақысын төлеу, ғылыми дәрежесі үшін қосымша ақы, үстемеақылар мен өзге де қосымша төлемдер белгілеу көзделіп отыр.
