Қазақстандық астық Эстония порттарына жіберіледі

Фото көзі: ElDala.kz

Халықаралық сауда географиясы өзгеріп жатқан жағдайда экспорттаушының бәсекеге қабілеттілігі тауардың сапасы мен бағасына ғана емес, оны түпкілікті сатып алушыға жеткізу құнына, сенімділігі мен болжамдылығына да байланысты. Бұл ой Астанада Қазақстанның көлік апталығы мен TransLogistica Kazakhstan 2026 халықаралық көрмесі аясында өтіп жатқан талқылаулардың негізгі тақырыбына айналды.

Әлемдік нарыққа Эстония арқылы шығу

Форумның маңызды оқиғаларының бірі KazGrain Ұлттық экспорттаушылар қауымдастығы мен Эстония теміржол компаниясы Eesti Raudtee (Эстония темір жолы) арасындағы ынтымақтастық туралы Меморандумға қол қою болды. Құжат Қазақстаннан Эстония порттарына астық жүктерін тасымалдауды дамыту мәселелерін қамтиды.

Келісімнің негізгі мақсаты – Қазақстан астығын теміржол арқылы тасымалдау логистикасын дамыту, Эстонияның көлік инфрақұрылымын пайдалану мүмкіндіктерін кеңейту және Силламяэ мен Мууга порттарына жүк жеткізуге қосымша жағдай жасау.

Eesti Raudtee атынан құжатқа компанияның бас директорының бірінші орынбасары Эркки Вейсман қол қойды. Ал KazGrain атынан қауымдастық басқарма төрағасы Қанат Көбесов қол қойды (суретте).

«Бүгінде қазақстандық экспорттаушылар үшін логистикалық бағыттарды әртараптандыру аса маңызды. Халықаралық көлік нарығындағы жағдай бір ғана бағытқа тәуелді болу бизнес үшін қосымша тәуекелдер туғызатынын және өнімдеріміздің бәсекеге қабілеттілігіне тікелей әсер етуі мүмкін екенін көрсетіп отыр.

Eesti Raudtee компаниясымен меморандумға қол қою – KazGrain мүшелерінің логистикалық мүмкіндіктерін кеңейту жолындағы маңызды қадам. Бірлескен жұмыс Қазақстан астығын Силламяэ мен Мууга порттары арқылы тасымалдау мәселелерін нақты пысықтауға және экспорттаушыларға жүк жеткізудің қосымша бағыттарын ұсынуға мүмкіндік береді деп сенеміз.

Біздің міндетіміз – туындаған қиындықтарға жауап ретінде балама бағыттарды іздеумен ғана шектелмей, тұрақты көлік логистикасы жүйесін біртіндеп қалыптастыру. Мұндай жүйеде экспорттаушының таңдау мүмкіндігі болып, транзит жағдайы өзгерген кезде де сауда байланыстары сақталуы керек», – деді Қанат Көбесов.

Бағыттарды әртараптандырудың басты нәтижесі – жекелеген бағыттарда шектеулер немесе қосымша қиындықтар туындаған жағдайда да сауданы жалғастыру мүмкіндігі.

Eesti Raudtee компаниясымен ынтымақтастық Қазақстан астығы экспортының логистикалық мүмкіндіктерін кеңейту құралдарының бірі ретінде қарастырылады. Сонымен қатар келісімдерді іс жүзінде жүзеге асыру тарифтер мен операциялық шарттарды келісуге, инфрақұрылымның қолжетімділігіне, жүкті бір көлік түрінен екіншісіне ауыстырып тиеуді ұйымдастыруға және нақты бағыттардың коммерциялық тиімділігіне байланысты болады.

Кооперация бәсекеге қабілеттілікті қолдайды

Қазақстанның көлік апталығы мен TransLogistica Kazakhstan 2026 халықаралық көрмесінің маңызды қорытындыларының бірі – көлік-логистика және экспорт нарығына қатысушылар арасындағы ынтымақтастық туралы келісім. Оған алты компания қол қойып, экспорттық логистиканы дамыту, Қазақстанның сауда мүмкіндіктерін кеңейту және экспорттық-импорттық тасымал көлемін ұлғайту бағытында күш біріктіруге уағдаласты.

Келісімге «Tranco PL» ЖШС, «Sultan Logistics» ЖШС, «АПСУ» ЖШС, «Ontustik Terminal» ЖШС, «ЛОГСОФТ» ЖШС және «KazGrain» ұлттық экспорттаушылар қауымдастығы қол қойды.

Құжат қатысушылардың кәсіби құзыреттерін, клиенттік базаларын, көлік ресурстарын, инфрақұрылымдық мүмкіндіктері мен цифрлық шешімдерін біріктіруді көздейді. Бірлескен жұмыс сауда географиясын кеңейтуге, астық және басқа да жүктерді тасымалдауды дамытуға, контейнерлік логистиканы жетілдіруге, сондай-ақ жүктерді терминалдарда өңдеу мен ауыстырып тиеу мүмкіндіктерін жақсартуға бағытталады.

Келісімге қол қою жеке компаниялардың оқшаулаған шешімдерден тығыз ынтымақтастыққа көшуге ұмтылысын көрсетеді. Бұл қазақстандық экспорттың бәсекеге қабілеттілігін арттыруға және тұрақты логистикалық тізбектерді қалыптастыруға мүмкіндік береді.

«Біздің міндетіміз – жеткізу тізбегін ұйымдастырудың барлық кезеңінде экспорттаушылардың мүдделері ескерілетін өзара іс-қимыл жүйесін қалыптастыруға ықпал ету. Логистикалық операторлардың, көлік компанияларының, терминалдық инфрақұрылым мен цифрлық шешімдердің мүмкіндіктерін біріктіру арқылы экспорт географиясын кеңейтуге және жаңа коммерциялық мүмкіндіктерді іздеуге жағдай жасаймыз. Түптеп келгенде, ынтымақтастықтың тиімділігі нақты нәтижелермен өлшенуге тиіс. Олар – жеткізілімдердің бәсекеге қабілеттілігі, жүк ағынының өсуі және қазақстандық өнімді өткізу нарықтарының кеңеюі», – деді «KazGrain» ұлттық экспорттаушылар қауымдастығы басқарма төрағасы Қанат Көбесов.