Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
ҚТЖ Өзбекстан бағытында астық тиеуге шектеу қойды
15:36
Өзбекстанға астық жөнелту қарқынының жоғары болуы теміржолда кептеліс тудырды. Қазіргі уақытта Сарыағаш станциясында 10 мыңнан астам вагон жиналып қалған. Бұл нормативтік жүктемеден 46%-ға жоғары. Бұл туралы Қазақстанның Астық одағының талдау комитетінің басшысы Евгений Карабанов мәлімдеді.
ҚТЖ мәліметінше, қыркүйек айында астық экспорты бойынша жөнелтілімдер рекордтық деңгейге жеткен. Қазан айының алғашқы аптасында да вагон ағыны бәсеңдеген жоқ. Алайда өткен аптада инфрақұрылымның шамадан тыс жүктелуіне байланысты астық жөнелту қарқыны төмендеді. Евгений Карабановтың айтуынша, қазір Сарыағаш станциясында тәулігіне орта есеппен 31 пойыз өткізіледі. Бір жыл бұрын осы бағытта шамамен 7 мың вагон жиналған, ал тәулігіне орта есеппен 32 пойыз өткізілген.
Қазіргі уақытта Сарыағаш станциясы арқылы пойыздарды өткізу көлемін арттыру мақсатында Өзбекстан теміржол әкімшілігімен жұмыс жүргізіліп жатыр.
«Сарыағаш бағытына вагондардың жиналу қарқыны төмендеген кезде ҚТЖ осы бағыт бойынша жүк жөнелтушілердің қосымша жоспарларын қарастыра бастайды. Астық тасымалдайтын жетекші операторлардың бірі – «Астық Транс» вагондардың шамадан тыс жиналуы және осы станцияда түсіру жұмыстарының баяу жүруіне байланысты Өзбекстандағы Какир станциясына бағытталған вагондарды уақытша беруді шектеді», – деп Евгений Карабанов хабарлады.
Бұдан бөлек, ҚТЖ 12–31 қазан аралығында Сарыағаш бағытына астық тиеуге тәулігіне 300 вагоннан аспайтын шектеу енгізеді.
Болашақ станциясында да пойыз қозғалысына қатысты күрделі жағдай қалыптасқан.
Сондай-ақ Евгений Карабанов өткен аптада ішкі астық нарығындағы белсенділік қалыпты деңгейде болғанын, бидай бағасы өзгермегенін атап өтті. Астық одағының мәліметінше, 3-сыныпты бидайдың бағасы сапасына қарай тоннасына 89 мыңнан 110 мың теңгеге дейін болды. 4-сыныпты бидай тоннасына 86–89 мың теңгеден, ал 5-сыныпты бидай 82–86 мың теңгеден сатылды. Бағалар элеватордағы ҚҚС-ты (16%) қоса есептегендегі құнды білдіреді.
Экспорттық бидай бағасы да тұрақты болды. DAP Сарыағашта 3-сыныпты бидайдың бағасы тоннасына 265–300 долларды, 4-сыныпты бидайға 255–260 долларды, ал 5-сыныпты бидайға 245–250 долларды құрады.
