Дүниежүзілік банк Қазақстанға ауылшаруашылығын қаржыландыру мәселелері бойынша кеңес береді

Дүниежүзілік банк Қазақстан үкіметімен бірлесіп, ауыл шаруашылығын қаржыландыру тиімділігін арттыру бағдарламасын дайындауда. Бұл туралы бүгін Дүниежүзілік банктің жетекші ауылшаруашылық экономисі Сергий Зоря онлайн-брифинг барысында мәлімдеді.

«Біз Қазақстандағы жалпы бюджет тиімділігін, әсіресе мал шаруашылығы мәселелері бойынша арттыруға болатын бірқатар резервтерді анықтадық. Қазір біз Қазақстан үкіметімен бірлескен бағдарлама дайындап жатырмыз. Коронавирустан кейінгі кезеңде бюджеттік ресурстар аз болатынын есептесек, олардың тиімділігін арттыру мәселесі маңызды болып табылады», - деді Сергей Зоря.

Оның айтуынша, Қазақстандағы ауыл шаруашылығына арналған бюджетте өзгертуді қажет ететін бағдарламалар бар. Атап айтқанда, мынандай бағдарламаларға: білім беру, ғылым, ирригациялық жүйелер, мелиорация, ақпараттық-кеңестік қызметтер үшін қаржыландыруды арттыру қажет.

«Бұл - өнімділіктің артуына және нарықтың барлық қатысушылары мен ауылшаруашылығы шығындарының төмендеуіне әкелетін бағдарламалар. Бүгінгі таңда аталған бағдарламаларға жалпы бюджеттің 25% -ы бөлінді, қалған 75-еуі фермерлерге тікелей төлемдер үшін пайдаланылады. Біз бұл төлемдердің бір бөлігі уақыт өткен сайын жалпы бағдарламаларға стратегиялық түрде берілсе жақсы болар еді деп санаймыз», - деді спикер.

Сонымен қатар, ол фермерлерге төленетін төлемдер еңбек өнімділігін арттыру және жаңа технологияларға көшу сияқты мәселелермен байланысты болған кезде жақсы нәтиже береді деген пікір білдірді. Олардың қатарында бидай және басқа да өсімдік өнімдерін өндіру, мал шаруашылығының тұрақты дамуы үшін үлкен маңызы бар жайылымдардың өнімділігін арттыру жатады.

«Шағын фермерлермен жұмыс істеу бағдарламаларына көбірек көмек қажет. Бюджеттің көп бөлігі ірі фермерлік шаруашылыққа жұмсалуда себебі олар бюджет қаражатын тез ала алады», - деп қорытындылады Сергий Зоря.