Қазақстан Қытайға бидай мен ет экспортын ұлғайтады

Фото көзі: Telegram/МТИ РК

Астанада Орталық Азиядағы Цзянсу провинциясының жаңа орталығы ашылды. Сондай-ақ, Қазақстан астанасында «Қытай (Цзянсу провинциясы) – Қазақстан» сауда-экономикалық ынтымақтастық форумы өтті, оның аясында тараптар сауданы кеңейту, қазақстандық ауыл шаруашылығы өнімдерін жеткізуді ұлғайту туралы уағдаласты. Бұл туралы ҚР Сауда және интеграция министрлігінің баспасөз қызметі хабарлады.

Ведомствоның мәліметінше, форумда қазақстандық экспортты әртараптандыру туралы уағдаластыққа қол жеткізілді: Цзянсуға бидай, ет және бал жеткізуді ұлғайту жоспарлануда.

Бұдан басқа, форумның негізгі қорытындыларының бірі «есіктен шекараға дейін» бірыңғай логистикалық тізбегінің бөлігі болатын Ақтау портында жаңа контейнерлік жобаны іске асыруды қоса алғанда, логистикалық ынтымақтастықты кеңейту туралы шешім болды.

Сауда министрлігі Цзянсу провинциясы әлемдегі ең қуатты индустриалды орталықтарының бірі екенін, оның өнеркәсібі әлемдік жалпы көлемнің 4%-ын құрайтынын атап өтті. Бүгінгі таңда Цзянсу компаниялары Қазақстанда 63 инвестициялық жобаны іске асыруда, бұл провинцияның Орталық Азия елдеріне инвестицияларының жалпы көлемінің 47%-ын құрайды.

Сонымен қатар, Сауда министрлігі Қытай көптеген жылдар бойы Қазақстанның ең ірі сауда серіктестерінің бірі болып қала беретінін хабарлады. Өткен жылдың қорытындысы бойынша өзара сауда көлемі рекордтық 49 млрд долларға жетті. Бұл ретте Қазақстан Қытайдың өңірдегі негізгі серіктесі болып табылады: біздің елімізге ҚХР-ның Орталық Азиямен жалпы тауар айналымының 60%-ға жуығы келеді.

«Біздің мемлекеттер көшбасшыларының стратегиялық көзқарасының арқасында ынтымақтастық орнықты экономикалық өсу мен өңірлік өзара байланысты дамытудың маңызды факторына айналды. Бүгін біз Цзянсу провинциясының бизнесін өнеркәсіпте, агроөңдеу, мұнай-газ химиясы және цифрлық технологияларда бірлескен жобаларды жүзеге асыруға шақырамыз. Астанада Цзянсу орталығының ашылуы біздің бірлескен жұмысымыздың қисынды жалғасы және жаңа өндірістік тізбектерді қалыптастыру құралы болатынына сенімдімін», - деп атап өтті форумда ҚР сауда және интеграция министрі Арман Шаққалиев.