АШМ биыл бизнес үшін қарсы міндеттеме енгізеді

Ауыл шаруашылығы министрлігі өткен жылы агроөнеркәсіптік кешенді субсидиялау тәсілдерін қайта қарап, нақты салаға назар аудармай, бірыңғай жолды қарастырған болатын. Шағын кәсіпкерлер мен орта бизнеске арналған субсидияларға қол жеткізудің талаптары да өзгертілді. Бұл туралы бүгін Үкімет отырысында Ауыл шаруашылығы министрі Сапархан Омаров мәлімдеді.

«Мемлекеттік қолдаудың тиімділігін арттыру үшін осы жылдан бастап бизнес үшін міндеттемелер кезең-кезеңімен енгізілетін болады», - деп атап өтті Ауыл шаруашылығы министрлігінің басшысы.

Оның айтуынша, базалық субсидияларды мемлекеттік қолдау көлемінің ұлғаюына байланысты 2025 жылға қарай ауылшаруашылық техникаларын жаңарту деңгейін 4% -дан 6% -ға дейін, минералды тыңайтқыштарды қолдану ғылыми негіздегі- 21%-дан 30% дейін арттыру жоспарланып отыр. IV репродукцияға дейін жоғары сапалы тұқымдарды қолдану деңгейі 93% -дан 97% -ға дейін артатын болады.

«Мемлекеттік қолдаудың негізгі принципі кәсіптің тұрақты болуында. Бұл фермерлерге ұзақ мерзімді қызметке болжам жасауға, жоспар құруға мүмкіндік береді», - деп атап өтті С.Омаров.

Тақырыпқа байланысты оқу: Қазақстандағы АӨК алдағы 5 жылда қандай мемлекеттік қолдау алады

Сонымен қатар АӨК субъектілерін қаржыландырудың қол жетімділігін арттыру мақсатында аграрлық секторды екінші деңгейлі банктер, Қазақстанның Даму Банкі  несие беру мүмкіндіктерін кеңейтуді жоспарлап отырғанын хабарлады.

Сонымен қатар, ауылшаруашылық өнімдерін форвардтық сатып алуды кеңейту және жастарға арналған агроөнеркәсіптік кешендегі жобаларды іске асыру үшін гранттарды енгізу мүмкіндігі қарастырылуда.

Агроөнеркәсіптік кешенді қолдаудың барлық шаралары үшін бірыңғай электрондық ресурс құру жоспарлануда.

Бұған дейін міндеттемелердің енгізілуін Ауыл шаруашылығы вице-министрі Рүстем Құрманов түсіндірген болатын. Агроөнеркәсіптік кешенді дамытудың ұлттық жобасының тұжырымдамасын талқылау аясында осындай 14 міндеттеме қарастырылуда.

«Біз 30 жыл қатарынан мемлекеттік қолдау көрсете алмаймыз және соған сйкес талаптарымыз да бар. Егер мемлекеттік қолдауды алған болсаңыз, соған қарай еңбек өнімділігін де арттыру қажет. Егер трактор сатып алу үшін инвестициялық субсидиялар бердік, яғни еңбек өнімділігі өсуі керек. Кейбіреулері үкіметтің қолдауын алады, алайда жерді дұрыс күтпейді. Бізде мәліметтер бар, біз сол бойынша жұмыс жасаймыз, соңғы 10 жылда топырақтағы гумустың мөлшері 17% -ға азайды. Яғни, егер сіз мемлекеттік қолдау алсаңыз, соғңан орай жерді, мемлекеттік меншікті күтіп ұстап, оны сақтау керек.  Егер оны сақтамасаңыз, онда жер учаскелері кері қайтарылады, жерді осындай күйге жеткізген жауапсыз жер пайдаланушыдан өтемақы төленеді», - деді вице-министр.