Ақмола облысы «Егін алқабынан дүкен сөресіне дейін жеткізу» жобасына кіруді жоспарлауда

2020 жылы Президенттің тапсырмасы бойынша Алматы, Жамбыл және Түркістан облыстарында «Егіс алқабынан дүкен сөресіне дейін» атты аграрлық кооперациялық тізбегін дамыту бойынша пилоттық жоба басталды. Степногорск қаласының үш тұрғыны оңтүстік әріптестерінің тәжірибесі бойынша көкөніс өсіретін кооператив құруға шешім қабылдады. Енді Ақмола облысының ауыл шаруашылығы басқармасы осы тәжірибені кеңейтуді жоспарлап отыр, осыған байланысты Ауыл шаруашылығы министрлігіне бюджеттік өтінім жолданды. Бұл туралы «Атамекен» Ұлттық кәсіпкерлер палатасынан хабарлады.

Аталған палатаның мәліметінше, азық-түлік тауарларын тұрақты сатып алуды қамтамасыз етуге 13 ішкі сауда субъектісін (сауда желілері, әлеуметтік павильондар) қатыстыру жоспарлануда. Сатып алынатын өнімнің жоспарланған көлемі - 5 млрд теңге тұрады, шамамен 1 мың тонна. Сауда желілері үшін өнім өндіру процесіне 10 шаруа қожалығын, 12 аграрлық өнім өндірушілерді және 10 қайта өңдеу кәсіпорындарын қосу көзделіп отыр.

Болашақта бұл жоба жеке шаруашылықтарға, шаруа-фермер қожалықтарына қайта өңдеуші кәсіпорындарға өнім өткізуді қамтамасыз етуге мүмкіндік береді деп күтілуде.

«Нәтижелі жетістікке жетуге бағытталған бірнеше қатысушыдан құралған кооперация өндірістік-өткізу тізбегіне біріктіріледі: тұтынушылар сапалы және арзан өнім алады, ал өндірушілер лайықты төлем арқылы пайда түсіреді. Мұндай ұйымдастырушылық құрылым қатысушыларға түрлі нарық конъюнктурасынан тәуелсіз болуға, өсірілген өнімді делдалсыз өткізуге, өнімнің өзіндік құнын оңтайландыруға, тәуекелдерді азайтуға мүмкіндік береді», - деп атап өтті «Атамекен» ҰКП директоры Ерқанат Мұсылманбек.

Тақырыпқа байланысты оқу: 2600-ден астам фермер «Алқаптан дүкен сөресіне дейін жеткізу» жобасына қатысуда

Ұлттық Кәсіпкерлер Палатасы хабарлағандай, «Ар-Ай» кооперативінің мүшелері өткен жылы 3,5 га картоп, 0,5 га сәбіз бен қызылша отырғызды. Ағымдағы жылы өсірілетін алқап 10 гектарға дейін артты, бұл ретте қияр, қырыққабат, қызылша, сәбіз, редис, картоп сияқты көкөніс түрлері де ұлғайды.

«Қазіргі таңда біз күніне орташа есеппен жарты тонна көкөніс жеткізіп отырмыз. Мысалы, қиярды 400 келі, қырыққабатты 700 келі жинадық. Өнімдерімізді сатауға арналып ұйымдастырылған өткізу орындарынан басқа өнімдерді тікелей елордалық базарларда сатуға мүмкіндігіміз бар, сонымен қатар, тауарлар Степногорск әкімдігі ұйымдастыратын жергілікті жәрмеңкеге қойылады», - деді кооператив жетекшісі Гүлмайра Баймақова.

Бірақ кооператив мүшелері өндірісті кеңейту үшін мемлекеттің қолдауды қажет етеді. Жақында олар «Бизнестің жол картасы-2025» бағдарламасы аясында 5 млн теңгеге дейін өтеусіз грант алуға конкурсқа қатысуға өтінім берді.

«Атамекенде» Ұлттық Кәсіпкерлер Палатасы атап өткендей, бүгінде облыста АӨК өнімдерін өндіру көлемін ұлғайту үшін жақсы ұсыныстар бар. Алайда барлық мәселе өнімді өткізу нарықтарының шектеулі болуына және импорттық өнімдермен бәсекелестіктің жоғары болуы кедергі келтіруде. Бүгінде өнімдерді өңірлік нарыққа жеткізу көлемі 10% -ды құрайды, олар негізінен құс еті, күнбағыс және сары май, көкөніс, жеміс-жидектер сатады.